Consideramos que’l pieslle del Centru Européu de Soft Computing de Mieres anunciáu ayeri supón un güelpe perduru pa la I+D+i n’Asturies, por tratase d’una de les pieces fundamentales na investigación na nuesa comunidá autónoma. Non yá se pieslla un centru d’investigación importante, sinón que tamién s’acaba con un símbolu d’esperanza pa mozos y moces investigadores. Una vegada perdíu esti centru d’investigación, tamos seguros de que nun va poder recuperase, lo que taraza cualquier posibilidá de supervivencia y crecedera pa que nun plazu de diez o quince años Asturies desenvolviera una ventaya competitiva n’investigación que s’estendiera a otros sectores productivos de la nuesa comunidá autónoma.
Esta situación ye consecuencia d’un modelu económicu que les grandes corporaciones como Liberbank quieren pa esta tierra, un modelu especulativu de rendimientos nel curtiu plazu onde los trabayadores, provisores y consumidores pierden tolos sos derechos en favor de los accionistes
El Gobiernu de Javier Fernández atropa más de 5.000 EREs y pieslles empresariales mientres el so mandatu. La so respuesta énte’l zarru del Centru Européu de Soft Computing respuende al mesmu patrón que’l restu los EREs: la inaición. Va díes recordamos qu’hai un bon númberu de preseos públicos pa tomar aiciones nestos casos y que nun se tán utilizando.
Dende Podemos Asturies esmoleznos qu’ésti nun ye un casu aislláu (ITMA, por casu, ta despidiendo a trabayadores), polo que facemos una llamada a la responsabilidá sobre la necesidá de rescatar al sector de la investigación, una materia que por non ser considerada urxente n’ocasiones pasa inalvertida la so enorme importancia pa llograr un texíu productivu asturianu más rentable, más social y con meyor sostenibilidá.
El nuesu grupu parllamentariu propón una mesa de trabayu na que patronos, Gobiernu, trabayadores y grupos políticos busquemos soluciones de curtiu y llargu plazu.
