Tres persones opten a la secretaría xeneral, con otres tantes llistes pal Conseyu Ciudadanu, nel procesu de renovación d’órganos de Podemos Asturies. Trátase (por orde alfabéticu del primer apellíu) de Vanesa Llaneza Carrasco, conceyala d’Empléu, Comerciu y Industria de Llangréu, qu’encabeza la candidatura Desde Abajo/Dende Abaxo; Daniel Mari Ripa, anguaño secretariu xeneral de Podemos Asturies y diputáu nel Parlamentu asturianu, qu’encabeza la candidatura Asturies 2019, y Héctor Piernavieja Cachero, diputáu nel Parlamentu asturianu, qu’encabeza la candidatura Agora Asturies. Los nomes y tolos perfiles biográficos de les personas que formen parte de cada llista pueden consultase na web de la II Asamblea Ciudadana d’Asturies: https://ac2-asturies.podemos-dev.info/

Al marxe de les tres candidaturas mentaes, cuatro persones preséntense al Conseyu Ciudadanu de Podemos Asturies como candidates independientes. Son Manuel Carrero de Roa, María del Carmen Granda Pérez, Cristóbal Ramón Gómez y Francisco Rodríguez Álvarez.

Trátase, en tolos casos, de candidatures provisionales, que se van convertir en definitives el sábadu que vien, día 1, tres el plazu pa resolver incidencies técniques. Esi mesmu día va tener llugar l’Alcuentru Ciudadanu (pa la presentación presencial de candidatures y documentos), nel Centru Municipal Xixón Sur de Pumarín, dende les 10.30 hores. El periodu de votación telemática va desarrollase ente’l 9 y el 13 d’avientu, y la proclamación de resultaos va ser el día 15, mientres que del 18 al 23 d’avientu va desarrollase la votación presencial de representantes de círculos en función de los documentos organizativos aprobaos.