L’antigua see del Institutu de Formación y Estudios Sociales (IFES), venceyáu a UGT, foi’l llugar escoyíu por Podemos Asturies pa ufiertar una rueda de prensa en redol al presuntu casu de corrupción na cúpula del sindicatu socialista que ta investigando la fiscalía. El diputáu y secretariu xeneral autonómicu del partíu, Daniel Ripa, repasó les distintes trames de corrupción política qu’afecten a Asturies y aseguró que «tol mundu albidraba o sabía que daqué pasaba con José Ángel Fernández Villa, coles obres d’El Musel, cola xestión privada de l’agua en dellos conceyos y colos cursos de formación d’UGT. Pero’l Gobiernu de Javier Fernández, en llugar d’investigar esta corrupción estructural, lo que fixo ye bloquiar midíes como la llei anticorrupción». Ripa recordó, frente a les que fueron les oficines del IFES, na uvieína cai Fonte de la Plata, que «ésti ye unu de los llugares que podría tar siendo investigáu pola fiscalía por un presuntu casu de autocontratación o por posibles sobrecostos na contratación del local».
Al parllamentariu moráu lláma-y l’atención que’l Gobiernu presidíu por Javier Fernández, «que siempres atrancara les investigaciones sobre presunta corrupción rellacionaes con UGT, decidiera personase na causa. Creemos qu’esa personación derívase de la solicitú d’investigación que rexistró Podemos Asturies esta selmana nel Parllamentu asturianu». Detalló al respeutive que «pidimos conocer les partíes de subvenciones, factures y conceutos específicos» ya ironizó al añadir que «queremos la información completa, a ser posible ensin esmagayar».
Daniel Ripa considera que, a última hora, «el Gobiernu de Javier Fernández ta denunciándose a sigo y UGT, col anunciu de la so denuncia contra’l Gobiernu, tamién se ta denunciando a sigo», yá que «hasta una trentena d’altos cargos d’UGT y del PSOE pasaron d’una organización a otra con total tranquilidá, asina que tamos énte una guerra de families ente’l sindicatu y el partíu. Esto recuérdanos a lo que pasó nel casu Bárcenas, onde’l PP empezó negando los fechos, dempués personóse pa bloquiar la investigación y darréu Luis Bárcenas denunció al Partíu Popular y el Partíu Popular denunció a Luis Bárcenas. Nesa situación nos alcontramos, con UGT y el PSOE denunciándose mutuamente».
Sollertó sobre’l fechu de que la investigación de la que ye oxetu’l sindicatu cercanu a la FSA nun afecta namái qu’al presuntu usu indebíu de fondos pa formación, sinón que «la xestión de los fondos pa inmigrantes tamién ta siendo analizada pola fiscalía y la policía, según l’eventual arriquecimientu de ciertos dirixentes, con sueldos de 60.000 ó 70.000 euros añales en dalgún de los casos de esti treme sindical y empresarial rellacionáu con UGT. El 1% de los sindicalistes esfrutaba d’un nivel de vida que nun se correspondía col 99% de les y los trabayadores». Frente a eso, constata que «daqué camudó y agora hai más ferramientes al serviciu de la ciudadanía. Por casu, el Observatoriu Ciudadanu Anticorrupción, que ta impulsando la investigación de los sobrecostos d’El Musel. Y dende les instituciones yá hai la capacidá de llevantar les alfombres y solicitar espedientes a los qu’enantes nun teníamos accesu». Concluyó faciendo «un llamamientu a la collaboración ciudadana pa esclariar qué pasó realmente col emplegu de fondos públicos».
