“El fraude fiscal constitúi un grave problema pa les faciendes públiques, que ven cómo se pierden recursos pa sufragar los servicios públicos, mecanismu esencial de cohesión social”, alvierte la entruga unviada a la Comisión pola delegación de Podemos na Eurocámara

Bruxeles, 4 d’abril de 2016. La delegación de Podemos nel Parlamentu Européu unvió güei, en conociéndose’l casu de los llamaos papeles de Panamá, una entruga escrita a la Comisión Europea pa reclama-y la so postura oficial al respective de si sofita la creación d’una Axencia Fiscal Internacional.

Na entruga, Podemos recuerda que presentó apocayá una entruga nel Parlamentu español sobre la creación d’esta axencia, una propuesta que foi “auspiciada pola ONU pa lluchar contra la elusión fiscal o la competición fiscal ente países, que tenga capacidá sancionadora y obligue a les empreses multinacionales a tributar onde xeneren beneficios”.
“¿Taría la Comisión dispuesta a sofitar una midida d’esti tipu, yá que nun hai nenguna midida específica qu’evite esta sangría de fondos públicos?”, plantega la entruga unviada a dicha institución europea.

La entruga, roblada la delegación de Podemos, llamenta que “nun dexen d’asocedese escándalos rellacionaos con paraísos fiscales, venceyaos non yá a multinacionales sinón a representantes políticos del más altu nivel, incluyíu dalgún miembru de la Comisión como’l comisariu Arias Cañete, que’l so redolada familiar apaez mentáu nel casu de los papeles de Panamá”.

“El fraude fiscal constitúi un grave problema pa les faciendes públiques, que ven cómo se pierden recursos pa sufragar los servicios públicos, mecanismu esencial de cohesión social”, plantega la entruga, que critica que “nun sospriende que, con casos como esti o’l de LuxLeaks, la ciudadanía abarrunte d’una connivencia ente’l mundu de les finances y la política pal so propiu arriquecimientu”.

Tania González: “El terrorismu internacional finánciase nos paraísos fiscales”

“Casos como’l de los papeles de Panamá nun son un meru accidente sinón una trama sistemática pa safar fondos y recursos públicos que se precisen pa financiar los derechos sociales y l’Estáu de bienestar”, asegura la vocera de Podemos nel Parlamentu Européu y Secretaría de Rescate Ciudadanu de Podemos.

Podemos presentó a finales de febreru nel Congresu de los Diputaos una entruga al Gobiernu d’España sobre paraísos fiscales y sobre por qué’l Gobiernu s’opunxera a la creación d’una Axencia Fiscal Internacional nel Cume de Financiamientu del Desenvolvimientu celebrada en 2015 en Addis Abeba, Etiopía, una oposición que tamién amosaron tolos Gobiernos europeos.
“Hai qu’acabar colos paraísos fiscales non yá pol fuximientu fiscal sinón porque los paraísos fiscales, como diz el Grupu d’Acción Financiera (GAFI) contra’l blanquéu creáu pol G8, ye onde se financien el terrorismu internacional, la trata de persones y el narcotráficu”, sentencia González Peñes.

La vocera de Podemos plantega qu’Arias Cañete tien de comparecer pa esplicar la so presunta implicación o la de la so familia nos papeles de Panamá y considera “esmolecedor qu’apocayá’l nome del comisariu Arias Cañete apaeciera presuntamente rellacionáu con otros episodios que tán siendo investigaos, como yá asocedió col casu Aquamed”.