Sofía Fernández Castañón y Mar García González van encabezar les llistes asturianes d’Unidas Podemos pal Congresu y el Senáu, respectivamente, nes elecciones del 26 d’abril. Completen la candidatura pal Parlamentu estatal, por orde na llista, Juan Antonio González Ponte, Rosa María Espiño Castellanos, José María Estrada Janariz, Ana Purificación Solís Rozas, María Victoria Ugedo Aulló y Jorge Álvarez González, mientres que na papeleta pa la cámara alta Juan Carlos Hevia Lozano va ocupar el puestu segundu y José Ovidio Álvarez Rozada, el terceru.
Sofía Castañón, realizadora audiovisual y poeta, nació en Xixón y yá fue cabezalera de la candidatura d’Unidas Podemos pola circunscripción asturiana a la cámara baxa nes elecciones de 2016, onde ella y Segundo González llograron escañu. Ye, amás de diputada, secretaria de Feminismos Interseccional y LGTBI de Podemos. Mar García, orixinaria del conceyu de Muros, ye trabayadora social na Conseyería de Derechos y Servicios Sociales y anguaño exerce como directora del Centru de Valoración de Persones con Discapacidá del área d’Avilés.
La representación d’Asturies mengua un escañu, respecto a les elecciones anteriores, pola perda de población. Van ser siete les diputaes y diputaos y cuatro los y les senadores asturianes que salgan d’esta cita coles urnes.
