El diputáu entruga al Executivu de Rajoy cuándo tien previsto emitir la orde ministerial que regule’l funcionamientu del centru llangreanu

El diputáu d’Unidos Podemos Segundo González rexistró nel Congresu tres preguntes relacionaes col centru pa persones con discapacidaes neurolóxiques Stephen Hawking de Llangréu pa saber en qué fecha ta prevista la so apertura y si l’Executivu de Mariano Rajoy «va condicionar la mesma a l’aprobación de los Presupuestos Xenerales del Estáu». Tamién quier conocer «en qué fecha tien pensao’l Gobiernu emitir la orde ministerial que regule’l funcionamientu del mentáu centru».

El parlamentariu asturianu recuerda que’l Stephen Hawking ye un centru de referencia estatal nel tratamientu de dolencies neurolóxiques dependiente del Imserso y «la finalización de les obres taba prevista pa 2012, pero tres el cambiu de Gobiernu a resultes de la investidura de Mariano Rajoy n’avientu de 2011 paralizóse, cuando s’alcontraba yá na so fase final». Dende entós, el centru «sigue ensin abrise, col coste d’oportunidad de tener una inversión que supera los 16 millones d’euros, 150 empleos y 60 places paralizaes».

Nuna visita reciente a Asturies, la directora del Imserso señaló que quedaba pendiente’l procedimientu abiertu p’axudicar el suministru del mobiliario, y anunció l’aprobación bien ceo d’una orde ministerial pa la creación del centru. Por tanto, apunta Segundo González, «agora mesmo’l centru alcuéntrase nun limbu alministrativu, a la espera de que la ministra de Sanidá y Servicios Sociales firme la orde ministerial p’abrilu». Según informaron fontes del propiu Imserso a la Federación de Pensionistes y Xubilaos de CC OO, el centru dispón de lo necesario pa la so puesta en funcionamientu. Sicasí, «nesa mesma comunicación el Gobiernu xustificaba’l retrasu na apertura pola tardanza na aprobación del proyectu de Presupuestos Xenerales del Estáu de 2018, que prevé dientro de les partíes del Imserso una asignación pa la contratación de personal nos sos centros asociaos nuevos, incluíu’l de Llangréu».