El parlamentariu asturianu d’Unid@s Podemos defende «la intervención pública por parte del Estáu n’Alcoa»

Segundo González pidió esti miércoles dende’l Congresu «la intervención pública por parte del Estáu n’Alcoa, n’aplicación del artículu 128.2 de la Constitución, dao que se demostró n’otros países de la UE que ye viable y que se puede facer». El diputáu d’Unid@s Podemos señaló amás que «nun podemos esperar a qu’haya un cadabre industrial sobre la mesa pa tomar les midíes necesaries, el Gobiernu ha de tener una política industrial seria y activa».

El parlamentariu asturianu dixo que «amás de les midíes urxentes pa mantener l’actividá n’Alcoa, el Gobiernu tien que rectificar l’ausencia de política industrial por parte del anterior Executivu del PP, pero tamién por parte del restu de gobiernos de los últimos trenta años, que mantuvieron la máxima de que la meyor política industrial ye la que nun esiste». Na so opinión, «si queremos ser un país competitivu nel que la industria tenga un papel importante necesitamos una política industrial activa por parte del Gobiernu, y eso pasa por una mayor implicación del Estáu na actividá industrial, l’aplicación d’unos precios de la enerxía competitivos pa la industria y que cualquier ayuda que se dea a les industries que s’instalen nel nuestru país tea vinculada al mantenimientu de l’actividá».

Sobre l’anunciu de pieslle de les plantes d’Alcoa n’Avilés y A Coruña, Segundo González asegura que «el Gobiernu tien que ser contundente delantre de l’actitú que ta mostrando la empresa. Esa contundencia pasa pola paralización d’inmediato del ERE, por aplicar tolos recursos que tien el Gobiernu a la so disposición pa evitar esa parada técnica y, nel casu de que nun s’atope un inversor y incluso tamién pa impulsar esa búsqueda d’un inversor, pola intervención pública del Estáu n’Alcoa». Considera que «estes midíes son fundamentales pa mantener l’actividá industrial d’Alcoa».