Foto de archivo. Iván G. Fernández

El diputáu d’Unid@s Podemos considera «intolerable qu’un trámite burocráticu tea paralizando la puesta en funcionamientu»

«El Valle del Nalón y Asturies yá tan fartos d’esperar l’apertura del Centru Neurolóxicu de Llangréu», aseguró esti martes Segundo González, respondiendo al anunciu del Gobiernu de Pedro Sánchez de que’l mentáu centru de referencia estatal pa persones con discapacidaes neurolóxiques va abrir les sos puertes nel segundu semestre d’esti añu, ensin concretar fecha. El diputáu asturianu d’Unid@s Podemos considera «intolerable qu’un trámite burocráticu tea paralizando la puesta en funcionamientu d’un centru que va proporcionar 150 empleos y 60 places, y nel que s’invirtieron yá dieciséis millones d’euros. Esiximos al Gobiernu l’apertura d’inmediato».

El congresista de la formación morada añade que l’Executivu central «respuende a una pregunta que realizamos n’abril comprometiéndose a abrir el centru nel segundu semestre d’esti añu. Esperábemos mayor concreción tando yá nel mes de xunetu y tratándose d’una infraestructura que lleva demasiáu tiempu a la espera d’esti trámite».