Na viéspora de l’aprobación pol Conseyu de Ministros del proyectu de Presupuestos Xenerales del Estáu pa 2019, Segundo González recordó-y al Gobiernu presidíu por Pedro Sánchez que «si quier sacar alantre les cuentes sabe que tien que cumplir l’acuerdu que firmó col nuestru grupu parlamentariu en materia de dependencia, pensiones, financiación de la educación de cero a tres años o inversión n’I+D+i». Asinamesmo, afirmó’l diputáu d’Unid@s Podemos, l’Executivu central «ha d’acabar col abandonu inversor del Estáu n’Asturies qu’arrastramos dende los gobiernos del Partíu Popular y que se traduz nun 77% menos d’inversión respecto a 2009».
El parlamentariu asturianu señaló que «esperamos que’l Gobiernu incorpore les propuestes que-y treslladamos nestos presupuestos, qu’haya inversiones p’avanzar significativamente nel plan de cercaníes ferroviariu y pa la finalización de la Variante de Payares en 2020, que s’incluya una revisión del peaxe de l’autopista del Güerna pal so llevantamientu en 2021 y una rebaxa del 30% hasta entós, qu’haya fondos abondos pa la reactivación de les comarques mineres, incluyendo’l pagu de les deldes pendientes, y una nueva xestión tresparente de los fondos p’asegurar la eficiencia na inversión».
Añadió que «esperamos tamién que se cumplan actuaciones imprescindibles nes principales ciudaes asturianes: la cesión de los terrenos de La Vega y l’estudiu de la vía rápida de La Pixarra n’Uviéu, el plan de víes de Xixón o’l soterramientu de víes en Llangréu». Amás de «avances significativos na autovía de La Espina pa la so finalización en 2020 y una oficina de repoblación nel Suroccidente asturianu».
Segundo González recalcó que «el Gobiernu socialista tien que recordar que solo dispón de 84 escaños nel Congresu y que’l nuestru apoyu ye fundamental y depende, ente otres coses, de que cumpla colos compromisos adquiríos pa tener unes cuentes a l’altura de lo qu’Asturies necesita y merez».
