«Les persones mayores paecen la ‘diana fácil’ de los cobros indebíos», señala Rosa Espiño en relación cola noticia de la sentencia de un xulgáu xixonés que considera abusivo cobrar el mes completu d’estancia nuna residencia xeriátrica a un residente fallecíu enantes de vencer la mensualidá. La diputada del Grupu Parlamentariu de Podemos Asturies llamenta que «les residencies xeriátriques tienen el preciu d’un resort de cinco estrelles, mientres los pensionistas esperimenten una subida de les sos pensiones que nun llega nin pa pagar un café nel centru social».

La diputada valora la sentencia xudicial que declara abusivo cobrar el mes enteru nuna residencia xeriátrica a un residente fallecíu enantes

La parlamentaria de la formación morada denuncia que les polítiques del Gobiernu de Mariano Rajoy «nun permiten a los mayores nin cubrir el coste de vivir coles necesidaes básiques de la Pirámide de Maslow. La brecha ente les pensiones y los gastos de vivienda, suministros y cesta de la compra nun dexen de crecer, y aquelles necesidaes que s’establecíen como vitales pa la sobrevivencia pasu ente pasu se convierten en privilexos pa unos pocos». A too ello xúnese «que-yos faen pagar lo que nun deben, como asocedió na residencia xixonesa mentada na sentencia, facturando un mes completu d’un serviciu que na metá nin se recibió nin s’emprestó».

Rosa Espiño alvierte de que, «precisamente pola so mayor vulnerabilidá, les persones mayores requieren d’una mayor protección y información sobre los sos intereses por parte de los poderes públicos, porque nun siempre pueden, y en munchos casos nin siquiera conocen, la posibilidá d’una reclamación xudicial. Requiérense mecanismos eficaces na defensa de los derechos que-yos asisten». Nesi sen, anuncia que «vamos pidir una entrevista cola Defensora del Ancianu pa conocer de primer mano cómo se ta trabayando n’Asturies, porque nun puede ser que dispongamos de poques ferramientes delantre d’estes situaciones y amás teamos dándoles mui pocu usu».