Daniel Ripa, Jara Cosculluela y Laura Tuero esponen en Zaragoza los principales llogros y reivindicaciones de Podemos Asturies
Representantes autonómicos de Podemos en trece comunidaes autónomes participaron esti llunes nun alcuentru que tuvo llugar en Zaragoza pa poner en común esperiencies, análisis y propuestes con vistes a les elecciones del mes de mayu. A la cita acudieron, en representación de Podemos Asturies, el secretariu xeneral, Daniel Ripa; la coportavoz d’Organización, Jara Cosculluela, y la responsable de Participación, Laura Tuero, qu’informaron de los avances na nuestra comunidá nos últimos años y que culminaron na negociación presupuestaria col refuerzu del ciclu educativu de cero a tres años, la reducción de les llistes d’espera y el descensu de les tases universitaries, ente otros munchos llogros propiciaos pola formación morada.
La representación asturiana compartió tamién na capital maña les sos reivindicaciones pa facer frente al abandonu en materia d’infraestructures que sigue sufriendo Asturies y que se concreta n’agravios como’l peaxe de l’autopista del Güerna o los retrasos nes obres de la Variante de Payares. En clave estatal, Jara Cosculluela, responsable asinamesmo de Feminismos de Podemos Asturies, espunxo que «el Día de la Muyer supunxo l’añu pasáu un puntu d’inflesión na visibilización de la llucha contra la brecha salarial, la discriminación y la violencia contra les muyeres. El 8 de Marzu va ser de nueves ún de los fitos d’esti añu y Podemos va siguir apoyando, na cai y nes instituciones, l’avance de les reivindicaciones feministes a nivel estatal y en toles comunidaes autónomes».
Dende Podemos Aragón, anfitrión del alcuentru d’esti llunes, púnxose de manifiestu que «España ye un país diversu y plural, pero al empar munches de les comunidaes autónomes comparten esmoliciones, problemes y retos futuros. Por eso mesmo consideramos que ye una bona idea empezar a trabayar xuntes, xuntos, y d’un mou sincronizáu y colectivu ente les direcciones de Podemos nes distintes comunidaes».
