La sociedá pública Recrea incumple’l deber de dar estabilidá a los puestos de trabayu de les y los profesionales que vixilen y ayuden nes visites a los museos dependientes de la comunidá autónoma. El modelu de xestión del sector públicu qu’abandera’l Gobiernu de Javier Fernández bien podría resumise nel casu de Recrea, un organismu nel que la dirección y la plantiya son escoyíos discrecionalmente, con salarios davezu más altos que los de les y los trabayadores de les conseyeríes, pa xestionar una serie de servicios públicos relacionaos cola cultura, el turismu y dalgún sector más.
Yá nun ye la Conseyería la que contrata, sinon Recrea, empresa pública porque vive de los fondos públicos y porque tien el monopoliu na prestación de dellos servicios públicos. Pero, a la vez, l’instrumentu Recrea subcontrata a empreses privaes la xestión d’estos servicios y tamién la contratación del so personal, que primero yera público. La empresa Ilunion ye la concesionaria de los mentaos servicios y contrata directamente, al marxe de les bolses establecíes, con contratos basura, reduciendo salarios, precarizando xornaes llaborales, pagando por hora trabayada envede por día, rebaxando les condiciones llaborales d’una manera que nun habría de tolerar el Gobiernu de la FSA.
Recrea pretendía siguir contratando d’esta manera irregular, abusando de los contratos en práctiques y maniobrando con contratos temporales cuando les places de refuerzu pal turismu de museos son estructurales, colo cual los contratos de trabayu habríen de tener calter fixu y periódicu. Función Pública nun dio autorización a Recrea pa continuar con eses práctiques y Recrea decidió subcontratar; ye dicir, privatizar un serviciu, y esa privatización ta resultando un fracasu de xestión.
