El nuesu diputáu na Xunta Xeneral Rafa Palacios refirióse güei a la oficialidá del asturianu y del gallego-asturiano de cara a la reforma del Estatutu d’Autonomía d’Asturies.

“L’asturianu y el gallego-asturiano, como llingües propies d’Asturies, tienen que formar parte del procesu de reconstrucción social y económica. La nueva normalidá tien que traer la oficialidá. Porque volver al estatus anterior ye volver a un estáu d’anormalidá onde les llingües propies d’Asturies son les úniques del Estáu español que nun son oficiales.

Que n’Asturies se puea falar castellano, asturianu y gallego-asturiano con normalidá. Que naide seya obligáu a falar nuna llingua na que nun quiera falar, pero que naide seya discrimináu por falar na so llingua propia. La llucha pola oficialidá ye una llucha democrática, reclama llibertaes y derechos que tán recoyíos nel artículu 3 de la Constitución española.

Dempués, una Llei de Normalización desenvolverá’l so usu y les llendes territoriales o d’otru tipu, reconociendo y respetando la pluralidá llingüística d’Asturies y poniendo fin a una discriminación y a una inxusticia intolerables pa cualisquier persona que se diga demócrata”.