Los diputaos d’Unidos Podemos nel Congresu Sofía Castañón y Segundo González, acompañaos por Lluis Miguel Orviz, responsable de derechos llingüísticos de Podemos Asturies, y Mayka Barros, responsable de movimientos sociales de IU-IX, rexistraron esti vienres na Cámara baxa una proposición non de llei pal reconocimientu de la especialidá docente del profesoráu de llingua asturiana y literatura. Fixéronlo na víespora de la histórica manifestación pola oficialidá del asturiano y del gallego-asturiano que va ser esti sábadu 21 d’abril n’Uviéu.

El 88% de los asturianos que sofiten la enseñanza de la llingua asturiana, los 500 centros públicos y concertaos ente educación primaria y secundaria, los 350 profesores que la imparten y los casi 30.000 alumnos y alumnes que la estudien, tán esperando dende va años que se cumplan y se faigan cumplir les lleis, tamién n’Asturies.

La reclamación de la especialidá d’asturianu ta fundamentada na Llei d’Usu y promoción del asturianu, nel artículu 3 de la Constitución y na carta Europea de les llingües rexonales. El mesmu conseyu Escolar del estáu, nel añu 2015, tamién la solicitó.

L’ausencia d’oficialidá tórganos crear dicha especialidá ensin modificar los reales decretos a los que fai referencia esta proposición non de llei que presentamos güei.

Que nun esista una especialidá en llingua asturiana amenorga’l derechu a la enseñanza de la mesma y amenórgase la calidá educativa una y buena’l profesoráu vese obligáu a camudar de centru tolos años incapacitándolos pa desenvolver proyectos educativos a mediu y llargu plazu colos sos alumnos y alumnes.

Quién paga esta situación n’últimu términu son los nuestros fíos y fíes, anque esto nun paez importa-yos muncho tantu al gobiernu del Partido Popular n’España y al del PSOE nel Principáu d’Asturies, que lleven dellos años pasándose la responsabilidá de resolver esta situación.

Con esta propuesta, nós pretendemos dar una solución que pasa per una ampliación cenciellu nún de los párrafos de dichos Reales Decretos: el 1594/2011 d’educación primaria y el 1834/2008 d’educación secundaria onde se recueyen les especialidaes esistentes en tales etapes educatives.