El grupu parllamentariu moráu va rexistrar na Xunta una proposición non de llei p’atayar la sangría de puestos de trabayu
El Grupu Parllamentariu de Podemos Asturies va rexistrar nos próximos díes na Xunta Xeneral una proposición non de llei cola que reclama del Gobiernu asturianu un protocolu d’actuación énte empreses en crisis col fin de revertir la sangría de puestos de trabayu que carez la nuesa comunidá autónoma nos últimos años. Asina lo anunció esti mediudía na Casa de Cultura Escueles Dorado de Sama de Llangréu la diputada autonómica Lorena Gil, que participó na Asamblea Social sobre Industria, Economía, Derechos Llaborales, Xeneración d’Empléu y Sostenibilidá. La parllamentaria responsable d’economía y empléu nel partíu moráu considera «absolutamente necesario establecer un protocolu, un sistema d’actuación que dea respuesta a empreses que tán entrando nuna situación difícil, empreses que precisen ser reflotaes o estructuraes o empreses que tán en peligru d’estinción a pesar de que son vidables».
La diputada recordó que n’Asturies «prodúcense cada añu alredor de 600 espedientes de regulación d’empléu, qu’afecten a un promediu de 6.000 trabayadores», y enfeó la rempuesta énte ello del Gobiernu asturianu, que «suel responder ufiertando ayuda so intereses espurios y n’ocasiones namái cuando exercen presión los colectivos afectaos». Ve imprescindible articular «un sistema ‘protocolizáu’ pa dar rempuesta al traviés de los distintos mecanismos que yá esisten na Alministración, al traviés d’una coordinación efectiva y de un usu eficiente de les ferramientes de promoción empresarial de les que dispon el Principáu». Con ello preténdese «reflotar a un determináu númberu d’empreses que cola inesistencia actual d’un protocolu tán empuestes al zarru, cola consiguiente perda de puestos de trabayu, impagos a autónomos y pymes, y descensu de la recaldación impositiva del Principáu».
Cerca d’un centenar de persones participaron na Asamblea Social de les Escueles Dorado, onde s’entamaron distintos grupos de trabayu con colectivos d’empreses en crisis, según representantes de microempresas, autónomos y trabayadores, trabayadores y entamadores d’economía social. Al alcuentru tamién s’allegaron la eurodiputada Tania González, l’hasta agora diputáu estatal Segundo González, la diputada autonómica Paula Valero y los diputaos autonómicos Emilio León, Daniel Ripa y Enrique López.
