L’acuerdu presupuestariu pa 2019 firmáu ente Podemos Asturies y el Gobiernu socialista establez la construcción de dos unidaes educatives nueves de cero a tres años en Lluanco, con 31 places nueves y la contratación d’otres cuatro técniques d’Educación Infantil. Les obres yá tán licitaes, pero la demanda actual en Gozón dexa pequeña esta ampliación primero incluso d’empezar les mesmes. Nesti momentu son 34 les neñes y neños ensin plaza y dalguna de les families afectaes, y otres con anterioridá, tuvieron que dir a vivir a otros conceyos a resultes d’esta situación, coles torgues nes sos vides y na conciliación familiar qu’ello supón.
Esto ye lo que treslladaron les mas de Gozón al Grupu Parlamentariu de Podemos Asturies. Pela nuestra parte, lo que-y treslladamos al conseyeru d’Educación y Cultura, Genaro Alonso, ye la satisfacción pol fechu de que yá se licitaran les obres y la necesidá de que tean disponibles lo primero posible les nueves unidaes, p’asegurar polo menos que nel cursu 2019-2020 puedan ser ocupaes, pero tamién la necesidá d’aprovechar esti aumentu de la ufierta educativa en Gozón pa buscar la fórmula que permita incrementar el númberu de places y d’esi mou atender tola demanda de les families nel conceyu.
La solución puede pasar pola ampliación d’espacios, el desdoblamientu d’eses unidaes pa facilitar que se pueda mantener la ratio de neñes y neños por cada técnica d’Educación Infantil. Pa ello, planteámos-y al conseyeru la posibilidá d’aprovechar espacios del colexu públicu La Canal, que con dalguna adaptación podríen resolver el problema que va tener la nueva construcción, que se va facer nel tarrén de l’antigua guardería.
El conseyeru d’Educación comprometióse a treslladar esta propuesta d’aumentu de places al director xeneral de Planificación de Centros y Infraestructures Educatives, Roberto Suárez Malagón, y a reunise col alcalde de Gozón, Jorge Suárez, p’analizar conxuntamente dende les alministraciones autonómica y local l’ampliación del númberu de places del ciclu de cero a tres nel conceyu del Cabu Peñes.
