Nun realizalo nel tiempu de negociación presupuestaria, demuestra’l nulu interés del Gobiernu de la FSA por sacar alantre unos presupuestos distintos a la prórroga de los de 2015, sofitaos por PSOE y PP.
El Gobiernu asturianu unvió, en contestación a la entruga rexistrada por Podemos Asturies, la primer información documental sobre la delda pública de la Comunidá Autónoma un mes dempués de rematada la negociación presupuestaria. El Gobiernu de Javier Fernández paez que namái que reaccionó énte la denuncia en prensa realizada por Podemos Asturies: trés díes depués de que s’espublizaren los barruntos sobre un posible fraude qu’esplicara la falta de tresparencia, Dolores Carcedo viose obligada a facilitar una información qu’al so xuiciu yera accesoria na ellaboración d’unos presupuestos p’Asturies.
La información llega al Grupu Parllamentariu de Podemos Asturies por conductu de la Presidencia de la Xunta Xeneral del Principáu d’Asturies como rempuesta a la solicitú d’información realizada pol diputáu Enrique López, y tan solo unos díes dempués de que’l partíu moráu denunciara públicamente la posibilidá d’un grave conflictu d’intereses ente la xestión de la delda pública y la delda del PSOE, posiblemente en manos de les mesmes entidaes financieres.
Nesa solicitú d’información, rexistrada’l pasáu 9 d’avientu, pidíase del Gobiernu asturianu que s’unviaren los “Cuadros d’amortización coles operaciones de Delda Pública viva del Principáu d’Asturies”.
Nel cuadru qu’agora unvía la Conseyera de Facienda, en representación del Gobiernu, presentáu sol epígrafe “Detalle amortización préstamo Principáu d’Asturies”, apaecen 65 operaciones de préstamu vivu”, realizaes con polo menos 15 entidaes financieres privaes.
Hai tamién detalle del endeldamientu alcordáu per aciu de mecanismos de financiamientu públicu.
La primera d’estes operaciones de préstamu rellacionaes ye del 21 de mayu de 2001 y la postrera del 17 de xunetu de 2015. El postreru de los vencimientos pal pagu d’estos préstamos vivos, llévanos al añu 2033.
Una información necesaria a la qu’amás tien derechu la ciudadanía asturiana.
Podemos Asturies vien desixendo la información detallada de la delda pública práuticamente dende la llegada al Parllamentu asturianu.
Yá na primer comparecencia de la Conseyera de Facienda énte la Comisión Parllamentaria de la so Conseyería, del pasáu mes de setiembre, desixóse información sobre la delda pública, llogrando evasives como única rempuesta.
Nel mesmu Plenu de la Cámara del 12 de payares, onde’l Grupu Podemos Asturies afalaba a una renegociación de la delda pública d’Asturies, preguntóse-y a la mesma Conseyera sobre la delda pública, el pagu d’intereses y el destín de los mesmos, ensin qu’hubiera nenguna respuesta qu’esclariara la situación real de les arques públiques respectu al endeldamientu.
Nel procesu de negociación presupuestaria, la desixencia d’una información clara sobre la delda pública asturiana, que se lleva ún de cada nueve euros del presupuestu, foi una cuestión prioritaria nes conversaciones calteníes ente Podemos Asturies y la FSA. Pero nin a lo llargo del procesu nin una vegada rematáu ésti, magar cuntar yá col pidimientu formal de la información dende’l 9 d’avientu, movióse ficha per parte del Gobiernu de Javier Fernández.
La negativa a la información solicitada agora por un diputáu al traviés de los conductos reglamentarios de la Cámara, supunxera un actu de rebeldía del Gobiernu, que yá nun podía refugar la presentación d’unes cifres que la ciudadanía tien de conocer y tamién quien los representamos.
Para Podemos Asturies queda demostráu l’interés del Gobiernu por quitar d’enriba un proyeutu de presupuestos nel que nunca creyó y forzar la prórroga d’unes cuentes públiques que sacó alantre en 2015 col sofitu del PP y coles que, ensin dulda, siéntese muncho más cómodu. Dende Podemos Asturies recordamos-y al Executivu de Javier Fernández qu’entá tamos a tiempu d’ellaborar unos nuevos presupuestos que tean al altor de los asturianos y les asturianes.
