Dende’l Grupu Parlamentariu de Podemos Asturies refugamos que’l preciu del serviciu seya l’únicu elementu de valoración nes contrataciones públiques que se lleven a cabu y reclamamos una contratación responsable por parte del Gobiernu asturianu. La movilización convocada pa esti martes delantre del Muséu de Belles Artes d’Asturies ye una de les que tán entamando los y les trabayadores de la seguridá privada na nuestra comunidá autónoma pa reivindicar que se dignifiquen les sos condiciones llaborales. Pidimos que l’Executivu socialista paralice l’axudicación de servicios a empreses qu’atropellen los derechos llaborales.

La visión de la contratación pública como un nichu de negociu facilitó que se faigan colos servicios qu’ufierta’l Principáu empreses qu’ufren un preciu baxu pa llograr el contratu correspondiente a costa de degradar la prestación y d’atropellar los derechos llaborales.

Podemos Asturies yá manifestó’l so sofitu a les denuncies contra’l contratu de vixilancia de los museos Arqueolóxicu y Barjola, axudicáu a una empresa que tuvo al so personal en fuelga pol incumplimientu de los más mínimos derechos llaborales, una empresa que nun paga y que vio anulaos contratos con otres alministraciones por mor de la so falta de profesionalidad.

Por too ello, volvemos a esixir que l’Alministración asturiana imponga nos pliegos de les contrataciones les condiciones qu’aseguren una prestación del serviciu digna y de calidá, lo mesmo pa les y los trabayadores como pa la ciudadanía destinataria del serviciu.