«Yá alvirtiéramos na Xunta Xeneral, durante la fixación de posición, de que votábemos a la escontra de la Llei de Montes pola so inconstitucionalidá», recordó esti sábadu Paula Valero na so visita a la Feria de Ganáu de l’Ascensión d’Uviéu. La diputada responsable de mundu rural del Grupu Parlamentariu de Podemos Asturies espresó la so «esmolición poles noticies que tán saliendo estos díes na prensa sobre la posible inconstitucionalidá de la modificación de la Llei de Montes asturiana no que cinca a los acutamientos de pastos en terrenos afectaos por incendios».

Recordó la parlamentaria que «la llei estatal permite facer tou tipu d’acutamientos, ensin especificar; siempre que se produza un incendiu hai qu’acutar», mientres que «la llei asturiana prohíbe llendar pal pastoréu, dalgo que ye menos restrictivo que la llei estatal, polo que podría dir contra esa llei». Añadió que «tamién alvertimos de que al nun axustase a la llei estatal, sobre too no que se refier a les ayudes de la Política Agrícola Común podríen vese afectaes, porque la llei diz que les hectárees quemaes han de pasar al cómputu d’hectárees que podríen ser subvencionaes. Y eso ye imposible».

Asina les cosas, dixo Paula Valero, tamos delantre de «una llei mal fecha, y queremos reuninos colos sectores afectaos pa ver qué solución-y damos a esto, pa pidir que se faiga una llei afayadiza nel tema de los acutamientos y consensuada con toles partes».