La cabezalera de Podemos Asturies pola circunscripción oriental esixe «equilibriu territorial na atención sanitaria asturiana»
Paula Valero señaló esti vienres dende Ribeseya, onde presenció les carreres de caballos na playa de Santa Marina, que «la noticia qu’apaeció esti xueves sobre la suspensión del serviciu d’Uroloxía por mor de la xubilación del facultativu pon d’evidencia que, cada vez que se produz una baxa o una xubilación, l’hospital cuerre’l riesgu de quedar ensin serviciu y l’asistencia de pacientes vese desviada a otros centros hospitalarios». La diputada y cabeza de llista de Podemos Asturies pola circunscripción oriental aseguró que «nun podemos permitir lo que pasa anguaño. Falten dos ciruxanos pa los que nun hai sustitutos, nun hai previsión pa sustituir a estos ciruxanos nin al urólogu».
La parlamentaria del partíu moráu morado dexó claro que «queremos equilibriu territorial na atención sanitaria asturiana y que’l hospital Francisco Grande Covián seya daveres el referente de la sanidá nel Oriente d’Asturies, y pa ello hai qu’asegurar que se realicen les sustituciones necesaries». De mou que, apuntó, «si tien qu’haber facultativos d’otros hospitales que temporalmente faigan el serviciu en Les Arriondes, pues que se desplacen, porque lo que nun podemos ye obligar a que seyan les y los pacientes del Oriente quienes tengan que dir a un hospital de Xixón. Han de ser los facultativos los que vengan equí pa estes sustituciones hasta que tengamos cubiertes eses places».
