La cabeza de llista del Oriente afirma en Llanes que «si queremos un Gobiernu de tresformación namás hai una opción: Podemos Asturies»
Les dos primeres candidates de la llista de Podemos Asturies pela circunscripción oriental, Paula Valero y Covadonga Tomé, destinaron la primer mañana de campaña electoral a repartir material informativu nel mercáu de Posada de Llanes. La diputada y cabeza de llista del Oriente alvirtió de que «los qu’en trenta años nun fueron quien a garantizar la conectividá nel mundo rural yá nun van ser quien a facelo».
Paula Valero señaló que «güei tamos equí informando a la xente sobre una de les midíes más importantes que llevamos nel nuestru programa electoral pa les zones rurales, que ye asegurar cobertura de wifi en toa Asturies». Y dexó claro que «si queremos un Gobiernu asturianu de tresformación que llogre un cambiu real namás hai una opción, que ye Podemos Asturies».
Les dos candidates tuvieron acompañaes por miembros de la llista municipal de Podemos Llanes.
