La diputada de Podemos Asturies súmase a la concentración que van llevar a cau les cofradíes de pescadores esti sábadu n’Uviéu
Paula Valero señaló esta mañana, en respuesta al anunciu por parte de la Conseyería de Desarrollu Rural y Recursos Naturales de que n’abril va establecese un criteriu más equitativu pal repartu de la cuota de pesca de la xarda, que «la conseyera ta vendiendo fumu sobre un acuerdu que, en tou casu, diba ser provisional y diba tratase d’un parche con tintes electoralistes». La diputada reiteró que dende’l Grupu Parlamentariu de Podemos Asturies «siguimos reclamando, como venimos faciendo nel Parlamentu Européu, nel Congresu y na Xunta Xeneral, un repartu llinial que nun se fundamente nos históricos de captures, que sabemos que fueron mal calculaos en detrimentu de la nuestra pesquería».
D’esi mou, añadió la parlamentaria de la formación morada, «diba favorecese a la pesquería sostenible, polos sos beneficios ambientales y sociales, de la que mayoritariamente forma parte la flota asturiana gracies a les sos artes d’impactu baxu y artesanales». Esos aspectos, aseguró, «nun tán teniéndose en cuenta nel repartu y ye importante introducir esta valoración, asina como valoraciones sociales y la so vinculación territorial, imprescindible pa llegar a establecer un repartu xustu».
Por too ello, concluyó Paula Valero en referencia a la concentración prevista pa esti sábadu n’Uviéu, «porque siempre trabayamos pa tratar de ser la so voz na Xunta Xeneral, nel Congresu y nel Parlamentu Européu, vamos volver a acompañar a los pescadores asturianos na concentración d’esti sábadu nel Paséu de los Álamos».
