Podemos considera “intolerable” que s’engañe a les maestres y maestros faciendo títulos que nun tienen cobertura reglamentaria
El diputáu de Podemos Asturies, Rafael Palacios, ta acabante de denunciar la situación que tán sufriendo les maestres y maestros que superaren la prueba de certificación de Llingua Asturiana adpatada al Marcu Común Européu de Referencia pa la Llinguas de nivel intermediu B2, que da la Conseyería d’Educación, “que ven como agora, cuando soliciten la inclusión de la so titulación nel rexistru personal de formación permanente, la propia Conseyería la refuga”.
Palacios señala que la Alministración “ye quien convoca, evalúa, ellabora, alministra y certifica unes pruebes de competencia llingüística adaptaes a la normativa europea y, depués, a les persones que les superen nun les valora en condiciones d’igualdá con otres llingües de Marco européu”.
En esi sentíu, el diputáu de a la formación morada considera “intolerable que s’engañe a les maestres y maestros faciendo títulos que nun tienen cobertura reglamentaria que garantice la so valoración y el so reconocimiento como méritos pa oposiciones, concursos de tresllaos o complementos salariales de formación permanente”. Amás, pa Palacios “ye inesplicable” que la Conseyería d’Educación nun reconoza les sos propies certificaciones y los sos propios títulos diciendo que “nun cuenten cola documentación requerida pola normativa vixente, quier dicise, un título oficial de les escueles oficiales d’idiomes”.
Otra manera, el diputáu de Podemos Asturies, denuncia “el despreciu históricu permanente, la falta de respetu y el maltratu institucional de l’Alministración a les llingües propies d’Asturies”, amás de la vulneración de los derechos llingüísticos recoyíos na llexislación asturiana, española y europea.
Por estos motivos, esixe al Gobiernu asturianu que “de manera inmediata tome les midides necesaries” pal reconocimiento y valoración, en condiciones d’igualdá coles demás llingües, de los títulos de Llingua Asturiana daos pola Conseyería d’Educación y la Universidá d’Uviéu. Y, nesa llinia, “implementar, ensin más retrasu, la creación de les especialidaes d’Asturianu y de Gallego-Asturianu, garantizando el so enseñu en tolos niveles educativos, incluyendo les escueles oficiales d’idiomes”.
