Los diputaos y diputaes de Podemos Asturies collaboren nel crowdfunding donando parte de la so asignación como parllamentarios

Podemos Asturies consiguió axuntar en solo dos díes más de 8.000 euros mediantes el crowdfunding llanzáu’l pasáu día 28 de xunetu por que la ciudadanía pueda costear los 12.000 euros que la xueza del casu de la “Operación Palacios” desixe a los demandantes pa poner en marcha la querella contra los representantes del PP y el PSOE que, presuntamente, arriqueciéronse de forma ilícita con dineru público de los asturianos.

D’esta manera y gracies a esta iniciativa, l’Observatoriu Ciudadanu contra la Corrupción d’Asturies (OCAN) depositó esta mañana (vienres 31 de xunetu), dicha fianza pa poder siguir alantre na investigación de la operación de “Los Palacios”. Los diputaos y diputaes de Podemos Asturies apurrieron el remanente del so sueldu destináu a proyeutos sociales, a esta campaña de financiamientu coleutivu.

Dada la magnitú del casu de los sobrecostos d’El Musel, en manos yá de l’Audiencia Nacional y d’autoridaes comuñales como la OLAF, Podemos Asturies entiende que la comisión d’investigación alcordada por PSOE-IX amás de ser insuficiente, llega tarde. La ciudadanía desixe encarar de forma sistemática’l problema de la corrupción. La creación d’una Unidá Anticorrupción, como les qu’esisten n’otros países europeos, ye fundamental pa dar satisfaición a esta demanda, polo que va ser una de les prioridaes de Podemos Asturies nos trabayos de la Comisión de Presidencia y Participación ciudadana constituyida güei mesmo.