“Usté fala en representación del Conseyu Económicu y Social (CES). El so silenciu ye tamién el del CES. Si nun ye quien pa falar nel so nome, nun merez el so puestu de presidente. Hoi, depués d’esta comparecencia, taría bien que dexara esi cargu. Nada de lo que dixo hoi, xustifica la so continuidá”. Asina de rotundu terminó Daniel Ripa la so fixación de posición na comparecencia del presidente del CES -a petición de Podemos Asturies- na Comisión d’Empléu que se cellebró esti martes na Xunta Xeneral.

«Podemos califica de “mui vergonzosa” la comparecencia del responsable del CES na Comisión d’Empleu, onde nun respondió a nenguna pregunta»

A lo llargo d’está comisión, los diputaos de Podemos, Lorena Gil y Daniel Ripa, preguntaron a Nicolás Álvarez sobre l’Informe de la Situación Económica y Social d’Asturies de 2015 y sobre qué tareas vino faciendo a lo llardo de los seis primeros meses del 2016. Pero nun atoparen respuesta nenguna por parte d’Álvarez que, hasta en quince ocasiones, namás dixo que se remitía al informe publicáu. Nesi sentíu, los diputaos de la formación morada reprocharon-y esa actitú. ““Usté cobra más qu’el presidente del Gobiernu d’Asturies: 64.000 euros. Y nun supo dicir hoi nin una sola razón que xustifique, non solo esi sueldu, sinón el so puestu de trabayu, nin si quiera la propia esistencia d’esi organismu. Tien la obligación de comparecer pa esplicar l’informe anual na Xunta Xeneral y usté diznos que lu lleamos”, criticaren.

Otra manera, tamién recordaren al responable del CES que los dictámenes emitíos por esti organismu sobre lleis que se tán tramitando na Cámara asturiana, nun 80 por cientu “nun pasen de ser namás que resúmenes d’eses propies lleis”. Amás reprocharen la posición del CES en cuantes a la Llei de Tresparencia, pues esta entidá opunxose al fechu de facer más tresparente la financiación de los sindicatos. “Ye paradóxico xusto cuando hai una investigación xudicial abierta -y ta acabante aprobase una Comisión d’investigación nel Parlamentu- sobre los cursos de formación.”, criticaren tanto Gil como Ripa. Amás, aprovecharen pa reclamar si dende el CES s’incluyó dalguna propuesta pa reflexar los informes d’análisis del mercáu llaboral y de la situación económia na Llei de Presupuestos del 2017. Y ye que la fecha del cierre d’esi informe, foi tres díes enantes al cierre del plazu de presentación de les enmiendes.

Nun contestu onde la tasa d’actividá n’Asturies ye de 8,5 puntos menor que la media estatal; onde la tasa d’empléu ye cinco puntos menor que la del restu del territoriu español, el porcentaxe de contratos de duración temporal ye del 93,1%; el desempléu na xente mozo ta nel 42% y el 60% de los y les desempleaes son paraes de llarga duración, el presidente del CES nun tuvo nenguna respuesta pa estes cuestiones. Nin quiso explicar el posicionamientu de los sos informes. Tampoco contestó les preguntes de Podemos en cuantes a la situación demográfica que padez Asturies, onde perdiérense 10.500 habitantes nel últimu añu, al empar que los nacimientos menguaren nun 1,1%, teniendo la tasa de natalidá más baxa del Estáu (6,3 nacimientos por 1000 habitantes) y la tasa de mortalidá más alta (12,2 fallecidos por 1000).

D’otru llau, les causes más directes de la brecha salarial -con una diferencia del 37% ente lo que cobren, nel so conxuntu, los trabayadores frente a les trabayadores, según l’últimu informe de CCOO- alcuéntrase nos baxos salarios asignaos a los sectores más feminizados. Un fechu que pon de manifiestu que los trabayaos atribuyíos a los roles de xéneru femenín, tovía se consideren de menor valor. La precariedá y les xornaes parciales, normalmente impuestes a les trabayadores, tamién tienen muncho que ver na esistencia d’esta diferencia salarial tan escomanada. Ente esti problema, el señor Álvarez nin opina, nin propón nada.

Amás, tamién-y preguntemos pol conxuntu de los EREs que se llevaren alantre n’Asturies a lo llargo de la crisis económica. Nesi sentíu, el presidente del CES volvió referise a los informes esin esplicar los datos nin la so valoración sobre potenciales midides. Falamos de cuasi 6.500 EREs ente 2006 y 2016, con 10.500 persones que perdieren el so trabayu y 110.500 que se vieren afectaes parcialmente. La I+D+i tamién se resiente n’Asturies. El gastu rexistró en 2014 el quinto retrocesu siguíu dende qu’entamó la crisis (-6,6% frente al 1,5% nel Estáu). Fai unos díes la propia Conseyería d’Educación presumía d’un mayor apueste pol I+D+i en comparanza cola Alministración estatal, pero esos datos parez ser que contradicen esa opinión. Tampoco conocemos les propuestes del CES en cuantes a esti apartáu.

Hai que recordar, qu’el presupuestu del CES ye de 754.000 € anuales, 80.000 euros por dictamen. 35.000 euros d’ellos van pa cada sindicatu y pala patronal. Hai quién podía pensar que, teniendo en cuenta’l silenciu del presidente del CES, esti órganu namás sirve como vía de financiación de delles entidaes y como sitiu onde mantener a un presidente mui bien pagáu y que nun ye quién pa falar nel so nome. Amás, el propiu CES esclui a una bona parte de la sociedá civil que tenía que tar representao nesa entidá.

Tamos a favor d’eliminalu, pero Ciudadanos ta poniendo pilancos tanto na so eliminación como na so reforma. Y tien que quedar una cosa clara: el CES nun ye reformable porque el mesmu y dellos formaciones polítiques bloqueen cualquier reforma. Hoi diérennos la razón otra vuelta sobre la so sensibilidá a la modificación d’esti organismu.