Más de dos millares de persones pasaron esti viernes pel Muséu Etnográficu del Pueblu d’Asturies, l’escenariu nel que por tercer añu consecutivu festeyamos el Día d’Asturies, una fecha qu’al empar val pa dar estrenu con tonu familiar y festivu al cursu nuevu políticu. A lo llargo de doces hores, xente llegao de toa Asturies participó na montonera d’actividaes programaes nesta celebración cola que les candidatures d’unidá popular de los nuestros conceyos y quienes trabayen día a día nel proyectu de Podemos Asturies celebramos el 8 de Setiembre.
A mediudía, hora prevista pa l’apertura de puertes, yá había una cantidá curiosa d’asistentes dando vida al recintu xixonés, qu’esti añu acoyía una ufierta d’actividaes festives, culturales y gastronómiques tovía mayor que n’ediciones anteriores y dirixida a persones de toles edaes y procedencia, acordies con esi espíritu de folixa abierta a la participación de la ciudadanía qu’estableció dende’l primer añu esta celebración. Una feria del llibru y del discu, de productos ecolóxicos y d’artesanía con cuasi cuarenta puestos dio color al Pueblu d’Asturies, mientres que la comida popular y les actuaciones musicales a lo llargo de tola xornada punxeron el sabor y el soníu a la folixa. La organización punxo un enfotu especial na programación d’actividaes infantiles y familiares, con talleres pa neñes y neños, xuegos tradicionales, cuentacuentos, teatru y un concursu de postres caseros.
A mediudía grabóse un programa d’El Telar TV, baxo’l títulu de ‘Vuelta al cole’, cola participación de los periodistes Cristina Fallarás y Antonio Maestre; el diputáu y secretariu xeneral de Podemos Asturies, Daniel Ripa; la vicealcaldesa por Somos Uviéu, Ana Taboada, y la portavoz d’En Marea nel Congresu, Yolanda Díaz. Alredeor de les siete de la tarde empezó l’actu central, cola intervención de representantes de Kellys Unión Asturias y Muyeres de la Escandalera, amás de Mario Suárez del Fueyo, portavoz municipal de Xixón Sí Puede; Rosario Hernández Catalán, conceyala de Somos Llangréu, y Emilio León, portavoz del Grupu Parlamentariu de Podemos Asturies. Darréu tomó’l relevu la música y la gastronomía, allargando la folixa hasta cuasi la medianueche.
En declaraciones a los medios de comunicación, Daniel Ripa defendió la necesidá de reforzar «una alternativa ética nuna Asturies que sigue apropiada polos sinvergüences y los corruptos» y recordó que «nesta folixa tamos festeyando dos años de llogros nel trabayu autonómicu y municipal. Hai que festeyar qu’una parte de la política ta cambiando hacia una política real, cercana a la ciudadanía, una política ética». Nesa mesma idea fondó Emilio León na so intervención n’El Tendayón del Pueblu d’Asturies, onde dixo que ye necesario «facer de la democracia la frontera que dexe fuera la impunidá y la indecencia». Y dexó claro que «lo meyor nun ta por venir, tenemos que salir a buscalo».
