La parlamentaria y el parlamentariu d’Unid@s Podemos consideren que «nengún diputáu o diputada asturiana habría de votar a favor»

El proyectu de Presupuestos Xenerales del Estáu (PGE) presentáu esti martes pol ministru d’Economía, Cristóbal Montoro, «sigue dexando a Asturies nel vagón de cola de la inversión territorial», aseguraron dende’l Congresu Sofía Castañón y Segundo González, la parlamentaria y el parlamentariu asturianu d’Unid@s Podemos. Na so opinión, «nengún diputáu o diputada asturiana habría de votar a favor d’estos presupuestos, porque nun pueden siguir riéndose de nós».

Segundo González llamentó que los PGE, «qu’habríen de valir pa que la recuperación llegara a los bolsos de la ciudadanía nun momentu en que la economía ta creciendo al 2,7%, nun valen n’absoluto. Montoro anunció dalgunes midíes estrella pa iguar o pa calmar lo que ta pasando nes cais, sobre too en materia de pensiones». Pero, añadió, «nun valen y vamos siguir viéndolo coles movilizaciones de les persones pensionistes, que van continuar esixendo lo que ye xusto y de sentíu común: la revalorización col IPC».

Nel casu concretu d’Asturies, dixo’l congresista, «l’añu pasáu yá se produciera un retrocesu nes inversiones y esti añu tamos tovía peor en comparación col conxuntu de comunidaes autónomes. La inversión n’Asturies esti añu ye un 24% menos qu’en 2016, un 54% menos qu’en 2012 y un 77% menos qu’en 2009». No que cinca a partíes específiques, la destinada a la meyora del serviciu ferroviariu de cercaníes na nuestra comunidá, «que se supón que diba ser de 680 millones d’euros, según anunciara’l ministru de Fomentu, queda en 30 millones. Esto ye una tomadura de pelo pa les asturianes y asturianos».

Pela so parte, Sofía Castañón recordó que «hai un clamor nes cais, vímoslo col Ocho de Marzu y coles nuestres y los nuestros mayores. Y cuando se ta falando de recuperación ye lóxico que la xente se pregunte cuándo-yos va tocar esa recuperación». La diputada asturiana afirmó que «mientres el ministru Montoro fala de crecimientu y de redistribución económica, d’acuerdos y d’asumir responsabilidaes, lo qu’analizamos y lo que vemos ye xusto tolo contrario. Y dende llueu tamién cuando falamos d’Asturies, que ye terrible que nun tenga sitiu nesi plan de reactivación del Gobiernu de Rajoy que cuenta cola mesma credibilidá que’l máster de Cristina Cifuentes».