La Tasa d’Actividá –la más baxa de tol estáu, con 13.000 persones menos- supón que l’únicu trabayu que s’ufierta ye la prexubilación o la emigración

Los nuevos datos de la Encuesta de Población Activa (EPA) reflexen qu’Asturies ye la única comunidá autónoma onde aumentó’l desempléu nel segundu semestre. Una xubida del 6,7% -5800 persones más en situación de desempléu- colo que’l númberu de paraos asítiase en 93.000. Con estos datos, Podemos Asturies considera que la EPA p’Asturies, ye la tarxeta de felicitación pal recién investíu presidente de la comunidá autónoma, Javier Fernández y, coles mesmes, ye la prueba de que nun se podía aprobar un gobiernu que ye más de lo mesmo. Hai que dicir que nin siquier el modelu d’emplegu precariu alimentáu poles diversu reformes llaborales ta sirviendo pa maquillar les cifres de desempléu. Les propuestes del PSOE nun crean empléu, parten miseria. Ye como cuando una familia probe curtia en munchos cachos un mesmu cachu de pan por que paeza qu’hai más, pero nun lu hai. Ye esmolecedor que la situación d’Asturies fai que nin reemplazando un emplegu de 1500 € al mes por trés de 500 € mensuales se revierta l’enclín, que caltién elevaos los niveles de desemplegu dende 2008.

A esto hai que sumar que’l clima creáu pola corrupción desincentiva que’l talentu esbrexe pente les redes clientelares. Les persones más válides ven que’l tratu de favor prima sobre la capacidá, amenorgando la motivación pa impulsar proyeutos económicos. Pa Podemos Asturies, la falta d’una visión estratéxica per parte de los gobiernos de distintu color torgó reemplazar un modelu industrial en declive por un modelu sostenible en tolos sectores. La innovación nun ye namái que necesaria nel sector secundariu, sinón tamién na producción agroalimentaria o nel ámbitu de la economía de los cuidos. Queremos destacar que la tasa d’actividá más baxa del país apunta a la necesidá d’apostar pola torna de talentos pa dinamizar el nuesu texíu económicu. Los trabayos ufiertaos polos gobiernos de la FSA son la emigración y les prexubilaciones