Lorena Gil alvirtió esti llunes, en declaraciones a los medios de comunicación nel Parlamentu asturianu, que «nel procesu de renovación de la Sindicatura de Cuentes ta produciéndose una reedición d’un pactu de réxime ente’l PSOE, PP e IU, que de nueves se ponen d’acuerdu no importante». La coportavoz parlamentaria y cabeza de llista de Podemos Asturies pa les elecciones de mayu concretó qu’eses tres fuerces polítiques «pónense d’acuerdu pa defender un modelu de Sindicatura que, quiero recordalo, nun detectó nin ún solu de los casos de corrupción gravísimos que conocimos n’Asturies».
La representante del partíu moráu añadió, sobre’l procesu de renovación de cargos nel órganu fiscalizador asturianu, que «nun podemos tar d’acuerdu con que se promocione a persones que taben dientro d’esa Sindicatura, y llámanos l’atención que’l tercer candidatu propuestu seya un políticu n’activu, un conceyal. Nun entramos a considerar la cualificación profesional de caúna d’eses persones, pero sí lo qu’esto representa». Amosó la so sorpresa pola actitú nesti asuntu de la FSA «y d’un candidatu, Adrián Barbón, que paez que venía a traer un cambiu y sicasí lo que se ta faciendo ye, insistimos, reeditar un pactu de réxime».
Lorena Gil aseguró que «l’acuerdu que s’alcanzó’l vienres pasáu pola Mesa de la cámara vulnera’l derechu de Podemos Asturies a presentar la so candidatura, por dos cuestiones; en primer llugar, escluía a la nuestra tercer candidata argumentando que nun cumplía los requisitos esixíos, dalgo que se discutió güei na Xunta de Portavoces y onde cuntamos col apoyu d’otros grupos p’alegar que sí cuenta con esa esperiencia necesaria y cumple los requisitos». Na so opinión, «les prieses nunca son bones conseyeres y nesti procesu hubo abondes. Esa candidatura hubimos de presentala’l vienres cuando, esa mesma mañana, se nos comunicó dende los servicios xurídicos que nun podíemos presentar una con solo dos candidatos, sinon qu’había de tener tres. Esi ye l’otru estremu col que nun tamos d’acuerdu, creemos que puede haber una llista abierta na que figuren los tres candidatos de la otra candidatura más los nuestros dos candidatos, y que cada grupu pueda escoyer un máximo de tres representantes».
Espresó’l so refugu «al sistema pa escoyer a eses persones y, por otra parte, esta mañana pasáronnos una propuesta d’un periodu pa subsanación de errores tres les manifestaciones que ficimos el sábadu, cuando falábemos de vulneración del nuestru derechu a presentar una candidatura a la Sindicatura y anunciábemos que díbemos interponer lo que yá ficimos esta mañana: una solicitú de reconsideración a la Mesa de la cámara alredor d’esta decisión que tomaron».
En respuesta a una pregunta sobre la valoración que’l partíu moráu fai de la llexislatura que ta acabando, la coportavoz y candidata señaló que «celebro que’l llabor de control del Parlamentu asturianu s’ampliara, que se consolidaran, por exemplu, les comisiones d’investigación na Xunta Xeneral». Recordó que la llexislatura entamó «d’una manera que nos hubiera gustado que fuera diferente, porque Podemos Asturies y Izquierda Unida sumaben más votos que’l PSOE, pudimos presidir el Gobiernu y les coses diben ser bien diferentes».
Lorena Gil completó la valoración asegurando que «col nuestru llabor equí traximos aire fresco a la Xunta Xeneral, fuimos mui esixentes y mui rigurosos, y pidimos que los demás grupos se comprometieran a trabayar tanto como’l nuestru poles asturianes y los asturianos. Pero atopámonos con un bloque frontal d’otros grupos que tengo que dicir que taben acostumaos a un ritmu de trabayu muncho más baxu». Y agregó que «nos hubiera gustao llograr más acuerdos, pero topámonos con una FSA que creemos que ta a gustu cola situación qu’hai, una situación francamente meyorable, y nun adoptó polítiques valientes en favor de la mayoría social».
Concluyó informando de qu’al plenu del vienres nel Parlamentu asturianu «vamos llevar una proposición non de llei sobre desarrollu profesional del personal estatutariu del Sespa». Recordó que’l vienres tamién «se va votar el dictame del proyectu de Llei de Salú. Espero que’l PSOE cambie y nun mantenga una actitú indulxente con una llei que nun nos paez enforma valiente p’afrontar un problema bien grave na sanidá asturiana, como ye’l de los conflictos d’intereses».
