La cabeza de llista de Podemos Asturies y Daniel Ripa reuniéronse con José Manuel Zapico, secretariu xeneral de CCOO d’Asturies
Lorena Gil aseguró esti martes, después d’un alcuentru n’Uviéu col secretariu xeneral de Comisiones Obreres d’Asturies, José Manuel Zapico, que «una de les cuestiones principales de les que falamos nesta reunión cola dirección del sindicatu ye la necesidá d’acabar cola precariedá llaboral y defender l’empléu de calidá, porque dempués de pasar los rigores de la crisis los beneficios de les empreses tán nun nivel como primero d’esa crisis y, sicasí, los salarios y l’empléu non». La candidata a la Presidencia del Principáu, que tuvo acompañada por Daniel Ripa, secretariu xeneral de Podemos Asturies, resaltó que «cenciellamente col desaniciu de les hores extraordinaries que nun se tán pagando díbemos poder falar d’un descensu del desempléu de polo menos un 6% n’Asturies. Ye’l momentu d’avanzar hacia empleos de calidá y salarios meyores».
La cabeza de llista del partíu moráu aseguró que «celebramos la recuperación de la selmana llaboral de 35 hores na Alministración autonómica, que fue resultáu d’una enmienda de Podemos Asturies a la Llei de Función Pública’l branu pasáu. Tenemos que siguir avanzando en derechos pa les y los emplegaos públicos». Por otra parte, recordó que «gracies a Xuníes Podemos llogramos qu’avance’l Salariu Mínimu Interprofesional hasta los 900 euros mensuales y nel nuestru programa ta algamar, pasu ente pasu, los 1.200 euros».
Lorena Gil faló amás de la necesidá de «sacar alantre midíes pa la defensa d’Asturies que tienen que ver coles comunicaciones, coles infraestructures y con cuntar con un papel principal nel conxuntu del Estáu, tamién no que se refier a la financiación autonómica». Y midíes, añadió, pa garantizar «unos servicios públicos de calidá. Ye necesario apostar por un tresporte, una educación, una sanidá de calidá…».
Pela so parte, José Manuel Zapico dixo que «hai coincidencia con Podemos Asturies na propuesta social, creemos que la próxima llexislatura tien que ser la llexislatura de les persones, non de les grandes empreses». Informó de que «dende Comisiones Obreres treslladamos la necesidá d’apostar por una industria moderna, fuerte, que permita xenerar empléu de calidá y estable; por una formación integral, con una universidá coordinada col mundu llaboral, asina como una Formación Profesional que permita dar el relevu xeneracional nes nuestres empreses».
