Yolanda Huergo señala que l’ésitu del 8M «significa que nun vamos dar nengún pasu atrás na reivindicación de los nuestros derechos»
Lorena Gil y Yolanda Huergo valoraron esti sábadu en Xixón los resultaos de la movilización masiva del Ocho de Marzu n’Asturies. La coportavoz parlamentaria y candidata de Podemos Asturies a la Presidencia del Principáu dixo a los medios de comunicación que «dende ayeri nun hai sitiu pal inmovilismu delantre del gritu asordecedor de la llucha feminista, de la llucha pola igualdá, y nesi sen emplazamos a tolos estamentos n’Asturies a responder a esi clamor». Añadió, yá en clave electoral, que «un Gobiernu de Podemos Asturies diba tener una perspectiva feminista que diba atravesar tola acción política del Executivu. El problema qu’atopamos actualmente ye que solo se lleven alantre determinaes midíes dende una parte del Gobiernu, pero hai un problema de voluntá del conxuntu del Gobiernu. La impronta feminista diba dexase ver en gobiernos de Podemos, tanto a nivel autonómicu como municipal».
La cabezalera de la llista del partíu moráu señaló que «celebramos la movilización del vienres, que de nueves supunxo una xornada histórica dempués del fitu del 8M anterior. Celebramos les decenes de miles de muyeres y homes qu’acompañaron la llucha pola igualdá, fue un gritu asordecedor peles cais de Xixón y tamién nes concentraciones qu’hubo en diferentes llugares d’Asturies». Dirixóse n’especial a la patronal, porque «ayeri conocíemos esi informe que presentaba la CEOE xustificando la brecha salarial poles diferencies nes habilidaes non cognitives de les muyeres, por exemplu. La llucha pola desigualdá ye un problema de primer orde y queremos conocer cuáles son les midíes concretes que l’empresariáu asturiano va aplicar pa tratar d’atayar esa desigualdá que vivimos nel mercáu llaboral».
Pola so parte, Yolanda Huergo celebró que la movilización feminista del vienres en Xixón «fue un ésitu de convocatoria, con más de cien mil persones que tuvimos na cai. Lo que significa ye que nun vamos dar nengún pasu atrás na reivindicación de los nuestros derechos nin tampoco nesta pelea por una sociedá más xusta, que sólo se puede llograr con nosotres al frente». La candidata a l’Alcaldía xixonesa recalcó que «lo del vienres fai que teamos dafechu convencíes del nuestru trabayu nes instituciones y na política, y non solo nun vamos perder nengún de los derechos qu’hasta esti momentu se nos reconocieron, sinon qu’amás vamos siguir trabayando por too aquello que queda por facer, que ye muncho».
