La diputada reprocha al conseyeru d’Empléu que l’Executivu asturianu «desprecia sistemáticamente el papel qu’una universidá tien de desempeñar nuna sociedá de la conocencia»

La diputada Lorena Gil reprochó esta tarde a Francisco Blanco, mientres la comparecencia na Xunta Xeneral del Principáu del conseyeru d’Empléu, Industria y Turismu, la escasa considerancia que l’anterior y el nuevu Gobiernu asturianu paecen amosar escontra la investigación y l’anovación. La parllamentaria de Podemos Asturies señaló mientres la so vez d’entrugues al conseyeru que «el modelu d’I+D+i del Principáu ye obsoletu. Nun hai sinerxa, nun hai gobernanza y échense en falta mecanismos de tresparencia, nun conocemos los criterios d’elección de proyeutos que se financien y hasta onde sabemos tampoco se miden les resultancies». Denunció que «los datos evidencien l’esbarrumbe de la investigación na nuesa comunidá autónoma, onde pasamos de 311 a 136 millones d’euros ente los años 2006 y 2013, con un amenorgamientu de cuasi qu’un 16% nel númberu d’empreses anovadores, mientres nel mesmu periodu n’otres comunidaes autónomes hubo una medría en dichu capítulu».

Lorena Gil alvirtió, coles mesmes, de que «nun ye posible crear planes nos que namái que les empreses escoyíes tengan derechu a opinar en materia d’anovación», pidió que se faigan públicos tolos convenios roblaos pol Gobiernu asturianu con empreses d’anovación y reclamó un compromisu non yá cola investigación aplicada, sinón tamién cola investigación básica. Nesti sentíu, aseguró que «la Universidá d’Uviéu vio amenorgáu’l so presupuestu nun 16% en cuatro años, lo que supon una perda de casi 35 millones d’euros. El Principáu desprecia sistemáticamente el papel qu’una universidá tien de desempeñar nuna sociedá de la conocencia». Añedió que la institución universitaria asturiana non yá nun ta ente les doscientes meyores del mundu, sinón que «yá casi naide fala de convertila nuna universidá puntera por cuenta de los retayos de medios y a la sobrecarga de trabayu docente».

Per otra parte, la diputada del partíu moráu recordólu a Francisco Blanco que Asturies «ye la comunidá autónoma que menos crez de too l’Estáu y con lo que fixeron ustedes nos últimos años empioró la situación. Esmoleznos especialmente la tasa d’actividá, del 50,5%, nueve punto per debaxo de la midida estatal». Amosó la so esmolición pola baxa calidá y los baxos salarios del empléu que se ta creando -«casi dos tercios de la población asturiana yá gana menos de 1.200 euros», afirmó – y espresó el so convencimiento de que pa revertir esa situación ye preciso «l’abandonu de les polítiques d’austeridá. Echamos en falta una política económica con mayor responsabilidá social».

La parllamentaria xixonesa punxo l’acentu nos elevaos niveles d’emigración xuvenil y recordó que, según datos del Institutu Nacional d’Estadística (INE), cerca de 40.000 persones d’edaes entendíes ente los 21 y los 40 años abandonaron la nuesa comunidá autónoma nos últimos años. Y si agora vese amenorgáu esi éxodu, esclarió, ye porque «cada vez queda menos xente pa dise». Frente a eso, «nun conocimos nenguna midida del Gobiernu asturianu pa favorecer la torna de talentos».

Lorena Gil tamién preguntó a Blanco pol Serviciu Públicu d’Empléu del Principáu (Sepepa), que «anguaño languidece», pos namái que pasaron por él el 2% de los contratos roblaos en Asturies en 2014. Quixo saber si’l nuevu conseyeru va siguir la llínea del so predecesor, Graciano Torre, que namái qu’abrió les puertes de la concertación social «a los sindicatos mayoritarios y llegó a negase a recibir a asamblees de trabayadores que nun veníen de les dos grandes centrales sindicales». Pidió que se reconoza coles mesmes como interlocutor na concertación social a los coleutivos de trabayadores y trabayadores autónomos, un réxime nel que trabayen cerca de 75.000 persones na nuesa comunidá autónoma. En cuanto al Institutu de Desenvolvimientu Económicu del Principáu (Idepa), Lorena Gil apuntó que preguntamos por qué non siempres cumple la so función y nun sofitó de manera proactiva a empreses en llucha como l’Hotel León o’l Mataderu Central de Noreña. Trátase d’empreses rentables nes que l’empresariu decidió dise pero que magar ello siguen siendo proyeutos vidables».

La parllamentaria de Podemos Asturies preguntó amás al conseyeru qué midíes tien previstes pa faer frente a «les redes clientelares y de corrupción, que tán llindando’l desenvolvimientu económicu de la nuesa comunidá autónoma» y sobre les fundaciones y empreses con participación del Principáu en que la so xestión «hai solombres». Denunció l’asuelu de la planta regasificadora d’El Musel, con un costu de 380 millones d’euros «que ta pagando la ciudadanía al traviés de les factures del gas y de la lluz». Preguntó al respective si «tienen ustedes dalgún plan y si daquién va asumir responsabilidaes polítiques pola construcción d’esta planta innecesaria».