Lorena Gil denuncia que «al agraviu del Gobiernu de Pedro Sánchez cola subida del peaxe del Güerna y a la falta de capacidá real d’acción por parte d’Adrián Barbón, y a los problemes nes conexones ferroviaries, tenemos qu’añadir el problema de les conexones aérees, del que llevamos meses falando y presentando iniciatives na Xunta Xeneral del Principáu». La coportavoz del Grupu Parlamentariu de Podemos Asturies señala que «el Gobiernu asturianu tien qu’escuchar a les más de 15.000 persones que firmaron pol mantenimientu de la llinia aérea con Londres-Stansted».
La representante de la formación morada recuerda que «s’aprobó una iniciativa de Podemos Asturies nel Parlamentu asturianu que facía xustamente esa petición» y añade que «yá víamos venir la situación que se produció n’ochobre, cuando Asturies quedó ensin vuelos internacionales. Y les cifres tán dándonos la razón. Conocimos qu’en payares l’aeropuertu asturianu perdió 18.000 pasaxeros, mientres los demás aeropuertos de la cornisa cantábrica aumentaben el so tráficu: el de Santander, alredor d’un 15%; el de Bilbao nun 12% y el de Vigo nun 6%».
Lorena Gil señala que «l’Executivu asturianu sigue ensin escuchar una demanda mayoritaria de la sociedá, que pide que se mantengan les rutes que contaben con mayor tráficu aereu». Asina les coses, afirma, «les persones que se vieron forzaes a emigrar tienen que pagar, pa venir a pasar les navidaes, unos precios qu’en dalgunos casos suponen mesmamente l’equivalente al so salariu mensual. Tienen que vivir una odisea pa poder venir unos díes a la so tierra, de la que fueron espulsaes por falta de polítiques industriales del Gobiernu asturianu».
