«La llingua ye patrimoniu de toles asturianes y asturianos, non de nenguna fuerza política», afirma’l responsable de Derechos Llingüísticos

Lluis Miguel Orviz, responsable de derechos Llingüísticos de Podemos Asturies, señaló esti martes a los medios de comunicación, tres la reunión mantenida ente representantes d’Izquierda Xunida y de la formación morada pa tratar l’asuntu d’una reforma del Estatutu d’Autonomía que reconoza la oficialidá del asturianu, que «pa poner en marcha la modificación estatutaria necesítase un mínimu de doce escaños y nesti casu sumamos catorce». Sin embargu, añadió que «el trabayu qu’agora tenemos per delantre ye siguir sumando apoyos, esperamos contar con otros partíos que yá dieron señales d’avanzar nel reconocimientu de derechos llinguísticos, como pueden ser Foro y la FSA».

Lluis Miguel Orviz detalló que IU y Podemos Asturies «llevamos un añu trabayando’l tema del asturianu conxuntamente con total cordialidá y acuerdu. Dímonos un tiempu de reflexón, d’análisis, de tratar de sumar más apoyos en favor del asturianu na Xunta Xeneral, y depués d’esti añu llegamos a la conclusión de que, una vez que la FSA aprobó nel so congresu últimu la oficialidá del asturianu, diba ser positivo nun perder esta oportunidá de reconocer los derechos llingüísticos de los y les asturianofalantes». La conclusión ye que la fórmula afayadiza pa facelo «nesti momentu ye a traviés d’una modificación del Estatutu d’Autonomía qu’incluya la cooficialidá».

Esplicó que «siempre entendimos que la llingua asturiana y el gallego-asturiano son patrimoniu de toles asturianes y asturianos, non de nenguna fuerza política», y recordó que «llevamos cuarenta años esperando que se reconozan estos derechos».