El responsable de Derechos Llingüísticos de Podemos Asturies diz que l’apoyu al asturianu «hai que demostralu con fechos, non con pallabres»

«L’apoyu a la llingua asturiana hai que demostralu con fechos, non con pallabres», asegura Lluís Miguel Orviz. El responsable de Derechos Llingüísticos de Podemos Asturies considera «un sucesu políticu llamentable» que la senadora María Luis Carcedo y el senador Vicente Álvarez Areces votaran na Cámara Alta en contra de conceder una ayuda económica a l’Academia de la Llingua Asturiana, polo que «pidimos a Adrián Barbón que los llame al orde».

Llamenta que, «una vez más, los representantes nel Senáu del PP, PSOE y Foro votaran contra los intereses d’Asturies. Siempre reivindicamos que’l Senáu ha de ser una cámara de representación territorial y non un cementeriu d’elefantes, como comprobamos que ye esta selmana, cuando unos representantes nel fin del so ciclu políticu antepunxeron los sos intereses particulares a los intereses de les asturianes y asturianos». Y añade que «anque de los representantes de Foro y del PP nun podíemos esperar nada, esmoleznos y atristáyanos fondamente’l votu de Carcedo y de Areces contra una ayuda económica que sí reciben les academies de les llingües del restu d’España».

Col so votu, afirma Lluís Miguel Orviz, «posiciónense contra la llinia favorable al asturianu que mantien l’equipu qu’encabeza Adrián Barbón como secretariu xeneral de la Federación Socialista Asturiana».