La movilización y entrada n’escena de los y les trabayadores de la sanidá, coles sos propuestes de devolución progresiva de los derechos retayaos en 2012, constitúi una oportunidá énte’l bloquéu del Gobiernu asturianu a la negociación. El personal sanitario incorpórase al escenariu de movilizaciones pa la recuperación efectiva de los derechos salariales y de xornada apocayá restituyíos.

Énte la negativa repitida del Gobiernu socialista, tres trés sesiones infructuoses de negociación, la reivindicación cobra un nuevu impulsu cola insistencia de los y les profesionales de la sanidá, que cunta col respaldu unánime del conxuntu de los sindicatos con representación nel sector, que les sos propuestes de flexibilización y disposición a axustar fueron asumíes pol restu de federaciones de la mesa xeneral.

Ente otres midíes, preven la devolución de la paga extra en 2016 o la recuperación paulatina de les xornaes de descansu por antigüedá. Polo xeneral, aporfien na so apertura a axustar, y referten-y al Gobiernu de Javier Fernández la so absoluta cerrazón, al nun camudar una coma de la so propuesta inicial. Paez ilóxicu que comunidaes n’idéntica situación, como Castiella y Llión, Galicia o Cantabria, tengan robláu yá un alcuerdu, ente que n’Asturies l’Executivu escúdase nunes cifres presupuestaries que los representantes de los y les trabayadores yá anunciaron que se veríen dispuestos a fraccionar.

Sedría torpe, polo tanto, nun atender a les razones que se planteguen, midíes de sentíu común y ampliu consensu na Alministración, que gocien del sofitu de la ciudadanía y de la inmensa mayoría del arcu parllamentariu asturianu. Podemos Asturies súmase a estes reivindicaciones ensin reserves, magar considera necesariu amplificar la demanda d’asamblees abiertes que yá ye un clamor en munchos centros de trabayu, como factor indispensable pa fortalecer les protestes.