Conceyales de Somos Siero, Somos Avilés y Xixón Sí Puede señalen que «les bases d’organización han de pasar pol ámbitu municipal»

Ediles de les candidatures municipalistas de tres de los conceyos implicaos na articulación del Área Metropolitana d’Asturies ofrecieron esti miércoles una rueda de prensa na parroquia sierense de Bobes pa reclamar qu’esi procesu de vertebración territorial tenga en cuenta la opinión y los criterios de los distintos sectores. David Alonso, conceyal de Xixón Sí Puede, señaló que «les bases d’organización han de pasar pol ámbitu municipal, que ye onde conocemos el territoriu, ensi pesllar les puertes a que haya una representación autonómica y estatal». Amás d’eso, añadió, «planteamos una segunda fase d’un futuru Conseyu Metropolitanu na qu’entren los actores sociales y económicos, y una tercera pata, una especie de comisión técnica, onde incluir a los sectores de desarrollu técnicu del conceptu d’área metropolitana».

L’edil xixonés apuntó que «dende les candidatures d’unidá popular o municipal va tiempu que presentamos un documentu, que nel casu de Xixón fue consensuáu con tolos grupos políticos, y esi documentu treslladámoslu a otros conceyos. Ayeri, nun alcuentru que tuvo’l conseyeru Fernando Lastra col alcalde de Vigo, Abel Caballero, sorprendentemente víamos que se ponía sobre la mesa la mayor parte d’esi documentu: cuestiones relatives a la cooperación, la coordinación…».

David Fernández Suco, conceyal de Somos Siero, esplicó que la rueda de prensa llevábase a cau en terrenos del proyectáu polígonu industrial de Bobes «porque esta ye una de les esperiencies que tenemos cuando la FSA xestiona a güelpe de ‘chiringuitu’ y ye dalgo que nun se debe repetir col Área Metropolitana. Tien que ser una apuesta más municipalista, centrada na xente que ta más pegada al territoriu». En clave local, destacó que «dende Somos Siero creemos que l’equipu de gobiernu municipal del PSOE y de Foro nun-y tán dando la importancia que merez a un tema como’l del Área Metropolitana. De fechu, tovía nun se reunió la comisión nel Ayuntamientu pa intentar treslladar una propuesta a los demás conceyos». Y dixo que «somos el centru xeográficu d’Asturies, cualquier propuesta pa vertebrar l’área metropolitana central tien que pasar per Siero. L’equipu de gobiernu ha de tomar la iniciativa y empezar a treslladar propuestes».

Xune Elipe, conceyal de Somos Avilés, espresó «la nuestra preocupación polos conceyos más pequeños que van tar nel Área Metropolitana. Queremos saber qué representación, que papel van xugar conceyos como Avilés o Corvera. Ye fundamental, porque va ser un área con aglomeraciones de población mui importantes en territorios pequeños, como puede ser Avilés». Dexó claro que «somos de la idea de que non tolos conceyos han de tener polígonos industriales. Estos localismos lo que faen ye duplicar gastos y xenerar situaciones ensin sentíu como que nun área pequeña esistan varios tipos d’estos servicios, colo que se desperdicia la potencialidá de los polígonos». Concluyó diciendo que «esti tipu d’infraestructures han d’atender a la meyora de la calidá de vida de la xente, nun pueden primar solo los criterios de tipu económicu».