Lorena Gil caltuvo esta mañana un alcuentru na Xunta Xeneral del Principáu con representantes de l’Asociación Empresa Muyer (ASEM), la principal rede de muyeres empresaries, directives y profesionales de la nuesa comunidá autónoma. La parllamentaria señaló que’l citáu colectivu «aconcéyase per primer vegada nel Parllamentu asturianu con un grupu políticu respondiendo a la nuesa invitación. L’alcuentru se engloba na ronda de conversaciones que venimos calteniendo con distintos axentes sociales».
ASEM «representa a un colectivu col que tenemos una especial identificación pol componente social de les sos reivindicaciones, al respeutive de les pymes y les autónomes, y no tocante a igualdá de xéneru nel ámbitu empresarial». Recordó que pa la ellaboración del programa electoral col que Podemos Asturies se presentó a les elecciones autonómiques «trabayamos con distintos colectivos, representantes del texíu empresarial asturianu, pa tratar de buscar un modelu productivu eficiente y responsable, tantu no económico como no social».
Na xunta d’esta mañana, «respondiendo a les esmoliciones de ASEM, falemos sobre representatividá de les muyeres en puestos d’influencia empresarial, la reconocencia de les cláusules de xéneru y otres cláusules de responsabilidá social empresarial dientro del ámbitu de la llicitación pública». Neso y en temes como «la economía somorguiada o les cargues alministrativa y tributaria atopemos puntos de mancomún sobre los que poder trabayar na mesma dirección».
Lorena Gil aprovechó la ocasión pa reafitar la posición de Podemos Asturies al respeutive de la problemática a la que s’enfrenten les empresaries y empresarios de la nuesa comunidá autónoma, recordando que mientres meses «defendimos les reivindicaciones de pymes y autónomos, quien sostienen dos de cada trés trabayos y que, por tanto, son los grandes impulsores de l’actividá económica».
