El conseyeru d’Empléu, Industria y Turismu del Principáu, Francisco Blanco, compareció na Xunta Xeneral del Principáu pa informar de los planes y actuaciones de la Sociedá Rexonal de Promoción (SRP) y sobre’l papel d’esta sociedá nun treme de más de 70 entes públicos del Principáu, 30 d’ellos sociedaes mercantiles públiques, onde la SRP ye una figura bien revesosa pola so falta de tresparencia y pola so xestión interna hasta la fecha. Blanco foi entrugáu por dalgunos de los casos más sonaos de fracasu na xestión de la SRP, como Nales Aluminium, Venturo XXI, Friovivo, Crady Eléctrica. En xunto, la SRP axunta más de 15 millones d’euros n’operaciones de financiamientu fallíes nos últimos cuatro años, ensin que se dieren desplicaciones de l’aprobación d’eses operaciones nin de los erros de control que llevaron a asumir eses perdes per parte de la Sociedá. Por casu, respondióse con más de siete millones d’euros por Nales Aluminium, saltándose los reparos qu’al respeutive de la operación manifestara la Dirección Xeneral de Presupuestos. El Grupu Parllamentariu de Podemos Asturies refertó al conseyeru la falta d’información y d’indicadores de siguimientu sobre les operaciones qu’entá permanecen actives, y la inesistencia de cuadros ya informes públicos que permitan a la ciudadanía evaluar l’actividá d’esta sociedá.
La mayor parte de les operaciones de financiamientu fallíes tienen elementos comunes, como la presencia de conocíos empresarios que piden fuertes volumes de financiamientu con empreses sobredimensionaes que nun respuenden a nengún de los criterios que la SRP diz siguir a la d’aprobar los proyeutos: especial interés p’Asturies, anovación, teunoloxía o internacionalización. Dempués, eses empreses beneficiaes acaben consumiendo’l financiamientu de forma pocu tresparente, dexando un fraye a les arques públiques y un problema de desempléu.
Reclamamos una mayor presencia de proyeutos pa microempreses y pequeñes empreses, como tamién pa empreses d’economía social. Paez que la SRP nun ta interesada en pequeños proyeutos, por bien estratéxicos, tecnolóxicos o potencialmente rentables que sían. Asina, la única vía que se-yos dexa a esti tipu de pequeños empresarios ye Asturgar, que tien avales vivos por 43 millones d’euros y llistes d’espera bien dilataes. La SRP, onde se dispón de más del doble de fondos vivos qu’en Asturgar, paez acutada a un escoyíu club d’empresarios que, ensin esperar coles, y ensin demasiao problema pol volume de les sos operaciones financieres, atopen financiamientu al momentu. La cobarde puesta en marcha de la llinia de capital semilla de la SRP non palía esti problema.
Llamamos l’atención sobre un grave problema d’independencia y dedicación nel conseyu d’alministración de la SRP, llenu de persones verdaderamente ocupaes, una y bones una bona parte de los conseyeros formen parte d’ensame de conseyos d’alministración d’otres sociedaes, públiques y privaes. Una d’estes persones caltién cargos en más de veinte sociedad coles mesmes. El presidente, ensin dir más allá, ocupa cargos como alministrador, conseyeru o apoderáu n’ocho sociedaes más, toes elles de la esfera pública. Reconociendo que la esperiencia profesional y la interrellación con otres sociedaes de dellos miembros del conseyu d’alministración puede xenerar conocencia y sinerxes provechoses, el treme al que se llegó na SRP fainos pensar que, en realidá, tenemos una composición del conseyu d’alministración gravemente endogámica, ensin posibilidaes de dedicación abonda y d’independencia en toma de decisiones.
Podemos Asturies tiende la mano al conseyeru pa camudar la SRP de raigón, recuperando lo que realmente tien que ser una Sociedá Rexonal de Promoción: una ferramienta de promoción empresarial moderna, amestada a les necesidaes del texíu productivu y abiertu a la ciudadanía al traviés de práutiques de tresparencia y bon gobiernu.
