Confiamos en que la llexislatura que vien sía la de la reconocencia de los derechos llingüísticos
Podemos Asturies tuvo presente esti sábadu na manifestación pola oficialidá de les llingües d’Asturies convocada, un añu más, pola Xunta pola Defensa de Llingua Asturiana y que volvió enllenar la cai Uría de Uviéu.
Tres de la pancarta d’apoyo a esta reivindicación histórica, el portavoz parlamentario de Podemos Asturies -y candidatu a l’alcaldía de Llangréu- Rafael Palacios, llamentó “la oportunidá perdía na pasada llexislatura de reformar l’Estatutu porque, énte la pasividá del Gobiernu d’Asturies, nun pudimos sacala alantre”.
De la mesma manera, Palacios recordó que pa Podemos Asturies “la oficialidá de les llingües propies ye un derechu irrenunciable. Lo que pasa n’Asturies ye una anomalía democrática” y, al empar, señaló qu’Asturies ye la única parte del Estáu español “onde les llingües nun son oficiales”. Al ser preguntáu sobre la postura de les fuercies de dereches y centro-derecha, Palacios alvirtió que “la oficialidá de les llingües propies nun ye propiedá de nengún espaciu políticu. Esto tenemos que lo facer col emburrie de toles fuerces polítiques y por eso espero que se sumen pa defender un derechu democráticu”.
Pola so parte, la candidata de Podemos Asturies a la presidencia d’Asturies, Covadonga Tomé, coincidió colos argumentos de Palacios. “Los derechos nun se conceden, se conquisten y, polo tanto, hai que conquistar esti ensin nengún tipu de duda”. Pa Tomé, el casu d’Asturies “ye una anomalía en comparanza con otras Comunidaes Autónomas onde los sos idiomes tán na cai, na escuela, en chigre, nel trabayu y na vida de la xente”.
La candidata manifestó’l so optimismu de cara al futuru. “Sinceramente, parezme que la llexislatura que vien ye la de la oficialidá”. Amás, afirmó que “la clase política tenemos que demostrar que tenemos la mesma madurez democrática que la población asturiana y esa firme defensa de los derechos, ente ellos, el llingüísticu”.
Pal númberu dos na llista electoral autonómica, Xune Elipe, “a los y les representantes que vamos intervenir na Xunta Xeneral na prósima llexislatura, correspuéndenos el deber históricu de solucionar esti conflictu”. Nesa llinia, Elipe afirmó que Podemos Asturies “va seguir apostando dende’l primer minutu pa que s’aabra la reforma del Estatutu y se llogre la reconocencia de los derechos llingüísticos para l’asturianu y el gallego-asturiano”.
