La guerra de clanes ente UXT y el PSOE va camín de faer españar un escándalu asemeyáu al de los ERE d’Andalucía
Les primeres dilixencies del casu centráronse nes diferencies qu’esisten ente los arriendos que pagaba Localmur -sociedá d’UXT- a los propietarios de los llocales onde s’impartíen los cursos, y los gastos que la empresa cargaba a IFES pa repercutilos nes subvenciones.
Precisamente, foi na see del IFES onde los diputaos de Podemos Asturies Daniel Ripa y Lorena Gil afirmaron que la “autodenuncia” del Gobiernu nun yera más qu’un intentu d’esviar l’atención, tal que fixo’l PP cuando denunció a Bárcenas. Tratar d’un procedimientu dilatoriu habitual ente los grandes partíos cuando s’enfrenten a casos de corrupción.
Cabe recordar que, cuando Podemos Asturies rexistró una enmienda parcial na qu’encamentaba al Gobiernu a derivar la metá de los fondos de formación al sector públicu, ésti retiró los presupuestos. Esi mesmu día, la Fiscalía anunció qu’investigaba les subvenciones de formación de UXT Asturies. Va unos díes y, precisamente cuando Podemos Asturies solicita información sobre determinaos espedientes que podríen resultar relevantes pa la investigación de la Fiscalía, el Gobiernu de la FSA preséntase como acusación, xusto a otru día. Ta claro que’l Gobiernu intenta distrayer l’atención y alteriar el cursu de la investigación, pero la Fiscalía prosigue col so trabayu, y empiecen a apaecer cantidaes ensin esplicación.
La Fiscalía pregúntase ónde fueron a parar los 400.000 euros que considera sumíos. El director del IFES, Andrés de Dios, dixo que “nun hai muncho qu’atopar”. Pel momento, la Fiscalía yá echa en falta les xustificaciones para ente 400 y 500.000 euros invertíos en cursos de formación impartíos pol IFES.
Podemos Asturies yá denunció que’l presuntu fraude podría alimentar sueldos tresbandaos de la cúpula d’UXT, gastos de luxu y regalos. Al igual qu’asocede nel casu Villa’ y, como yá dixo Daniel Ripa, “tol mundu sabía lo que pasaba”. A la fin, los trabayadores son les grandes víctimes de les maturrangues d’unos pocos: el 1% vivi como enxamás podría suañar el 99% restante, tal que dixo, precisamente, Justo Braga, dirixente de la UXT.
Paez que la “autodenuncia” del Gobiernu trátase d’un intentu más pa distrayer l’atención de la pocu disimulada ‘guerra de clanes’ na que s’atopa somorguiáu’l PSOE asturianu. Ta claro que n’Asturies esiste un enfrentamientu soterráu ente diverses families del socialismu, una llucha que, tres la debacle electoral del 20-D, ta convirtiendo al partíu nun auténticu barcu al debalu. Al berru de sálvese quien pueda’, los socialistes de Xixón lluchen por controlar la xestora del PSOE, ente que la FSA y el so sindicatu lluchen por nun vese abasnaos pola Fiscalía. Mentanto, la ciudadanía pregúntase cómo ye posible que la UXT y el PSOE, que comparten decenes d’altos cargos, intenten facenos creer que nun formen parte de la mesma estructura, pa lo bono y pa lo malo.
Confiamos en que’l Gobiernu nun atranque les investigaciones, que nun repita la mesma actitú obstruccionista que caltuvo na investigación del ‘casu Villa’ y la desapaición de los fondos mineros y que dexe trabayar al poder xudicial.
