Los grupos parlamentarios de la Federación Socialista Asturiana (FSA-PSOE), el Partíu Popular y Ciudadanos decidieron refugar la declaración institucional que dende’l Grupu Parlamentariu de Podemos Asturies presentáramos al restu de fuerces polítiques de la Xunta Xeneral con motivu de la conmemoración, la selmana pasada, del Día Internacional de la Llingua Materna, que se vien celebrando cada 21 de febreru dende l’añu 2000 tres la so proclamación pola Asamblea Xeneral de les Naciones Xuníes a propuesta de la Unesco.
El testu propuestu resaltaba que toles llingües del mundu son patrimoniu de los pueblos y comunidaes que les empleen como elementu de comunicación y d’interrelación, pero tamién patrimoniu de la humanidá nel so conxuntu, pola so aportación a la diversidá y a la bayura cultural de la raza humana. Amás, constatábase nél que n’Asturies hai quienes se reconocen nel castellanu como idioma maternu y quienes lo faen nel asturianu o nel gallego-asturiano, y qu’unos y otros merecen respetu y igualdá de derechos, polo que se defendía un escenariu xurídicu estatutariu nuevu, axustáu a esa realidá y que garantice una convivencia con armonía y normalidá ente les distintes manifestaciones llingüístiques.
La declaración que propunximos nun defiende otra cosa que la igualdá de derechos ente asturianes y asturianos, yá seyan falantes d’una llingua o d’otra. Chócanos que’l PSOE, que va poco asumió la oficialidá del asturianu y del gallego-asturiano como un compromisu electoral, refugara la mentada declaración a traviés del so grupu nel Parlamentu asturianu. Entendemos qu’una declaración institucional adquier un valor que va más allá de lo simbólico o testimonial, porque ta nel so espíritu treslladar a la sociedá un consensu políticu, nesti casu sobre un asuntu, el del nuestru patrimoniu llingüísticu, qu’habría de mantenese a salvu d’enfoques partidistes o d’otros intereses. N’Asturies, como demuestren les encuestes sociollingüístiques, la mayor parte de la sociedá nun ve nengún problema onde dalgunos sí quieren velu y se muestra a favor d’afondar nos derechos llingüísticos de toles asturianes y asturianos, al marxe de cuála seya la so llingua materna.
