Cuando superamos los 90.000 paraos, solo’l 2% de les contrataciones fáense al traviés del Serviciu Públicu d’Empléu.
La directora del SEPEPA, Luisa Pérez, niega la externalización de nenguna xestión dependiente de la entidá, ya inclusive se refier a les axencies privaes d’allugamientu como “entidaes collaboradores ensin ánimu d’arriquecimientu”.
Luisa Pérez asegura que nun hai externalizaciones nel Serviciu Públicu d’Empléu. Sicasí, los datos demuestren que la mayoría de los recursos nun se destinen a financiar proyectos públicos, sinón a entidaes esternes. Nesi sentíu, mientres la so comparecencia d’ayeri, la directora del SEPEPA fixo apreciaciones que podría compartir un axente comercial d’Eulen o de la Fade. Esto esmoleznos. Luisa Pérez amuésase incapaz d’esplicanos qué porcentaxe de los más de 80 millones d’euros que recibe la entidá destinar a empreses privaes y organizaciones empresariales.
Podemos poner un exemplu, afitándonos nel proyectu de presupuestos: de los capítulos 1, 6 y 7 (referentes a tresferencies de capital a entidaes locales pa fomentu del empléu), namá’l 28% taba destináu a la xestión pública directa, frente al 72% que s‘externalizaba al traviés de distintos programes. Trátase de tresferencies a organizaciones que, en munchos casos, constituyeron una rede clientelar n’Asturies. Esto xenera dos consecuencies gafíes: la necesidá d’un marayu d’alministrativos encargaos de fiscalizar les subvenciones (lo que nun asegura que nun esista fraude) y la falta de control de la calidá del empléu creáu con esta externalización. El SEPEPA fomenta asina la creación d’empléu precariu.
Luisa Pérez tampoco foi capaz de detallar la ratio d’orientador llaboral por demandante inscritu d’empléu, una cifra clave pa entender a qué se dedica’l SEPEPA. Ayudámosla de nuevu colos datos: 25 orientadores profesionales pa 95.000 paraos, 3.800 persones por cada orientador. O, lo que ye lo mesmo, 30 minutos al añu dedicaos a cada paráu.
Pa cubrir la escasez d’orientadores llaborales, el SEPEPA recurre a financiamientu esternu pa contratar a 49 persones que va faer funciones d’orientación llaboral. Sicasí, Luisa Pérez nun foi capaz de detallar qué formación específica van da-yos y nun aseguró que sían orientadores profesionales y que tengan formación y esperiencia afayadiza. ¿Creen que’l SESPA puede contratar veterinarios y convertilos en cardiólogos? ¿Nun consideren que les resultancies nes operaciones del corazón van ser meyores con un cardiólogu que con un veterinariu?
Ensin esta orientación llaboral afecha los paraos nun tienen sofitu abondu nel desenvolvimientu d’itinerariu de carreres y acompañamientu. Y esto inflúi nos datos de desempléu y la baxa tasa d’actividá. Como solución a esi déficit d’orientadores profesionales, el SEPEPA opta tamién por esternalizar el serviciu dende conceyos a sindicatos. Esto ye, a un paráu llámen-y del SEPEPA y únvienlu a realizar la orientación a UXT. Tocantes a los 25 orientadores d’oficiu en plantiya de l’Alministración esto ye lo que fixo Función Pública: los que yeren interinos lleváronlos a xuiciu pa consolidar les sos places. Xuiciu que’l SEPEPA perdió. Énte esta situación, en cuenta de convocar places d’orientadores, sacáronles a concursu, echaron a los orientadores y asitiaron nel so llugar a personal alministrativu, castigando de camín a quien ganaron el xuiciu. Ye un clásicu del gobiernu del PSOE.
Paez que convirtieren el serviciu públicu d’empléu nun nichu de negociu. Hai cuatro centros de formación públicos, pero la formación llévenla empreses privaes, FADE y UXT. Hai contornes enteres onde nun esiste nin un solu centru públicu de formación pal empléu y, nes ciudaes onde esisten, la ufierta de cursos ye bien llindada. Esto xenera un círculu viciosu: como hai pocos centros públicos y la dotación ye llindada, non puede cubrir la demanda y, pa desaniciar esta situación, dedíquense fondos a centros non públicos. La consecuencia: sigue habiendo pocos centros públicos con poca ufierta formativa. Nesi sentíu nun tenemos d’escaecer qu’esiste una denuncia de la Fiscalía pola xestión d’esos multimillonarios fondos per parte d’UXT. Luisa Pérez foi incapaz de faer autocrítica sobre la evaluación y fiscalización que se llevó a cabu.
Per otru llau, Luisa Pérez afirmaba fai non muncho qu’el SEPEPA “nun s’encarga de buscar trabayu”. Si nun ayuden a buscar trabayu, ¿a qué se dediquen? El SEPEPA solo intervién nel 2% de los puestos de trabayu que se creen n’Asturies. Destina 1.900 euros a la patronal y les axencies d’allugamientu por asitiar a paraos.
En Asturies hai 95.000 paraos, más 30.000 emigraos dende l’entamu de la crisis, principalmente por falta de trabayu, y siquier un 15 o 20% más que dexó d’inscribise na oficina d’empléu. Paez que la directora del Serviciu Públicu d’Empléu nun sabe por qué los paraos dexen d’inscribise. Ye senciellu: porque pierden la esperanza de que’l SEPEPA pueda ayudalos. Nun hai nada más grave. Y tampoco Luisa Pérez esplica qué va faer pa camudalo.
