Podemos Asturies ye’l primer partíu que, con representación electoral, arrenuncia a les subvenciones ellectorales énte la repetición de los comicios
Ripa, que tuvo acompañáu pol restu de diputaos na Xunta Xeneral, por representantes del Conseyu Ciudadanu Autonómicu y pola vicealcaldesa d’Uviéu, Ana Taboada, destacó que’l máximu muérganu políticu de Podemos n’Asturies tomó esta selmana ésta determinación: “A la ciudadanía asturiana namá-y va a costar el so votu sofitar el cambéu n’Asturies y n’España. Nin un solu euru a los votantes”, desplicó. Amás, informó que los gastos de campaña van ser sufragaos coles donaciones de les diputaes y diputaos, amás de les posibles aportaciones voluntaries, al traviés de los microcréditos.
Ripa comentó que los ciudadanos y ciudadanes nun tienen que pagar del so bolsu nada, porque los partíos políticos nun fuéremos quien a formar un gobiernu. “Esto nun tien de suponer un costu adicional. Y tampoco va de ser más o menos austeros, sinón qu’hai una parte de necesidá”, esplicó. Amás, criticó que nestos cinco meses que pasaron “quedó claro ónde ta asitiáu cada partíu políticu. Nun creemos qu’una campaña de marketing de miles d’euros, pa tracamundiar los fechos, pueda camudar lo que toos vimos colos nuesos propios güeyos”. Según el secretariu xeneral de Podemos n’Asturies, “solamente cuntando la verdá de lo qu’asocedió ye abondo pa encarar esta campaña electoral”.
Per otra parte, Ripa recordó que nun se trata d’una repetición d’elecciones sinón de “completar el relatu” de lo que pasó nos últimos meses onde, según él, el PSOE “echóse en brazos” d’Albert Rivera, que de la mesma lo fixo nos de Mariano Rajoy (PP), “y ente los trés bloquióse cualesquier opción de formar gobiernu”.
D’otra manera, pa Daniel Ripa “frutu de la incapacidá” pa crear un gobiernu de progresu pal que Podemos “tendiera la mano”, el país vese empuestu a nueves elecciones, que “pretenden que paguen los ciudadanos con grandes campañes de marketing pa maquillar lo asocedío”. Nesi sentíu, según Ripa la inminente campaña electoral n’Asturies “nun va costar un euru” a los ciudadanos per parte de Podemos y matizó que l’arrenunciu a la subvención electoral adóptase nel ámbitu del Principáu, con independencia de lo que’l partíu alcuerde en caúna de les comunidaes autónomes. A lo último, el secretariu xeneral de Podemos Asturies, recordó que la formación ye’l primer partíu que, con representación electoral, arrenuncia a les subvenciones electorales énte la repetición de los comicios.
