Héctor Piernavieja señaló esti martes que «el plan de víes de Xixón ye una actuación fundamental, non solo pa tresformar la malla urbana y coser la barrera ferroviaria qu’anguaño parte la ciudá, sinon que tamién ye una actuación básica y prioritaria pa la movilidá nel conxuntu d’Asturies». Por ello, añadió’l diputáu del Grupu Parlamentariu de Podemos Asturies, «nun entendemos les dudes que planteen el Ministeriu de Fomentu y el PSOE cola firma del conveniu que yá taba acordáu por tres alministraciones que nel so momentu taben presidíes por tres partíos políticos de diferente color».

El diputáu de la formación morada recordó que «dende qu’en 2011 s’inauguró la estación provisional de la cai Sanz Crespo, la perda d’usuarios nesta estación ferroviaria ronda’l 40%, un datu dramáticu pa la principal ciudá d’Asturies». Na so opinión, «si de verdá creemos na movilidá sostenible, si de verdá queremos apostar pol ferrocarril, nun caben estes dudes económiques sobre un proyectu fundamental pal conxuntu d’Asturies y en concreto pa Xixón». Asina les coses, pide «que’l Ministeriu de Fomentu y que’l PSOE despexen toa duda y se comprometan, poniendo la so firma en papel a la mayor brevedá posible pa esti plan de víes, con esta tresformación de la movilidá urbana y del entornu urbanu de Xixón».