«Un Gobiernu qu’únicamente espera a que llueva nun ta capacitáu pa resolver los problemes d’Asturies», diz el diputáu sobre la contaminación

Héctor Piernavieja anunció que’l Grupu Parlamentariu de Podemos Asturies rexistró una pregunta dirixida al Gobiernu asturianu col envís de saber «qué tipu de midíes, más allá de la restricción del tráficu, se tan tomando pa reducir los intensos niveles de contaminación d’estos díes». Dexó claro que «los protocolos de calidá del aire han de cumplise en tola so estensión. Yá diximos en numberoses ocasiones qu’estos protocolos paécennos insuficientes y si amás les midíes básiques nun s’aplican únicamente queda esperar a que llueva. Y un Gobiernu qu’únicamente espera a que llueva ye un Gobiernu ineficiente, ineficaz, que nun ta capacitáu pa resolver los problemes que tien Asturies».

El diputáu del partíu moráu llamentó que, por tercer día consecutivu, la nuestra comunidá tea «n’alerta por contaminación y el Principáu adopta una actitú propia d’un alumnu que busca xustificar los sos suspensos echándo-y siempre la culpa a otros. Con unos planes de calidá del aire que namás se tán cumpliendo parcialmente coles restricciones de tráficu ye difícil que la situación meyore y paez que solo s’encomienden a que’l tiempu cambie pa que la dispersión de partícules seya más eficaz». Na so opinión, «ye mui difícil que la xente cumpla coles restricciones de tráficu cuando nada se sabe de la reducción nos precios del tresporte públicu a comprometida nos planes de calidá del aire nin cuando la xente que va al volante del so vehículu particular ve cómo les chimenees industriales siguen emitiendo cola mesma intensidá».

Héctor Piernavieja considera que l’Executivu asturianu «nun ha d’esixir a unos más qu’a otros. Los protocolos de contaminación han de ser cumplíos por toles partes. Si l’Alministración nun cumple no que se refier al tresporte públicu y la industria nun cumple pola parte que-y toca, ye mui difícil esixir a los vecinos y vecines que cambien el so mou de vida».