Héctor Piernavieja esixe «al conseyeru Isaac Pola y al PSOE asturianu que dexen de toma-y el pelo a les asturianes y asturianos cola regasificadora d’El Musel, una infraestructura que representa un modelu económicu fracasáu y caducu». El diputáu de Podemos Asturies respuende asina al fechu de qu’esti martes «salíen reclamando por enésima vez la puesta en funcionamientu d’una instalación illegal, el mesmu día en que se publicaba la variación del consumu de gas, que supunxo una caída del 8,1% n’Asturies nel añu últimu».
El diputáu del partíu moráu denuncia que «el modelu enerxéticu socialista pasó de la dependencia del carbón autóctono a la dependencia del carbón d’importación qu’entraba per El Musel, y agora puede pasar a depender del gas ruso o argelino col fin únicu de salvaguardar una obra faraónica como la d’El Musel, que fue dafechu demencial». Recordó que «el Reglamentu d’Actividaes Molestes, Nocives, Insalubres y Peligroses torgaba la posibilidá de que l’actividá de la regasificadora se desarrollara tan cerca de viviendes. La so derogación ‘ad hoc’ pa intentar tapar la chapuza de la construcción de la regasificadora supón una vergoña. El Musel necesita un plan estratéxicu a llargu plazu que reformule’l tráficu de mercancíes hacia modelos más sostenibles y qu’aporten alto valor añadío, en cuenta d’aneciar n’idees pelegrines y atrasaes».
Hector Piernavieja conclúi diciendo que «el compromisu que-y planteamos a los demás partíos políticos ye reclamar a Enagás el ‘pastizal’ que ta cobrando dende 2012 pol canon d’instalación d’unes instalaciones illegales que nunca funcionaron. Quexámonos de que nun hai perres, pero regalámosles a empreses privaes ensin nengún pudor».
