Enrique López presentó esti miércoles, en rueda de prensa, la proposición non de llei que’l Grupu Parlamentariu de Podemos Asturies va defender el vienres nel plenu de la Xunta Xeneral cola que se pide que’l Gobiernu asturianu abogue pola restitución del derechu a la xubilación parcial de les empleaes y empleaos públicos. El diputáu de la formación morada recordó que la Llei del Estatutu Básicu del Empleáu Públicu de 2007 «punxo los pegollos pa reconocer el derechu a la xubilación parcial, siempre que se dieran los requisitos qu’establez el Réxime Xeneral de la Seguridá Social. La foleada de recortes nes alministraciones nos últimos años acabó llevándose per delantre tamién la conquista del derechu a la xubilación parcial. A traviés d’un real decretu de 2015, el Gobiernu de Mariano Rajoy borró d’un plumazu esi derechu pa miles de funcionaries y funcionarios».

El diputáu va defender nel plenu una proposición pa favorecer el remocicamientu de les plantiyes y la creación de empléu público

El parlamentariu camienta que «ye de xusticia social iguar esta discriminación reconociendo esti derechu de forma espresa y posibilitando amás con él el remocicamientu necesariu de les plantiyes de personal de les alministraciones y la creación d’empléu público p’atender los servicios que s’empresten a la ciudadanía, servicios esenciales». Añadió que «Asturies quier ser cabezalera na ofensiva pa iguar esti agraviu. Pa ello, treslladamos esta iniciativa al conxuntu de la nuesa organización nel Estáu y previsiblemente va contemplase na modificación del Estatutu Básicu del Empleáu Públicu qu’Unid@s Podemos va presentar nes Cortes Xenerales».

Per otra parte, Enrique López faló del ciclu de movilizaciones sociales multitudinaries entamáu’l Día de la Muyer cola fuelga feminista y que va tener continuidá’l sábadu con motivu de la defensa del sistema públicu de pensiones. «Va ser una movilización histórica, la segunda en nueve díes dempués de la del Ocho de Marzu», dixo’l diputáu, que presaxó que «cientos de miles de pensionistes y non pensionistes van salir a la cai pa dicir que la redistribución de los beneficios ha de llegar tamién a la sociedá». La situación de les pensiones «nesti momentu ye dramática. N’Asturies, cuatro de cada diez nun lleguen al salariu mínimu. Ye un escándalu y un escarniu pa la xente que cotizó durante tola vida y que s’alcuentra con qu’al final de la so etapa llaboral los recortes, los despidos y demás lleven a una reducción de les pensiones que-yos impide vivir con dignidá». Alvirtió de que «esto l’Estáu tien de correxilo de forma prioritaria. El Gobiernu ha de tomar nota, porque la xente ta pasando de la pasividá a ser activa y a esixir lo que-yos correspuende».