El portavoz parlamentariu participó na manifestación en Xixón de les víctimes asturianes del fraude de la cadena de clíniques dentales

 

Enrique López participó esti llunes na manifestación que llevaron a cau peles cais de Xixón les persones afectaes n’Asturies pol fraude de la cadena de clíniques dentales iDental. El portavoz del Grupu Parlamentariu de Podemos Asturies señaló que «tamos equí pa continuar apoyando a les estafaes y estafaos, persones que confiaron nuna empresa privada, poniendo la so salú bucodental nes sos manes, y a quienes unos pirates acabaron estafando». Recordó que nel mes de xunu «llevamos iniciatives sobre esti tema al Parlamentu asturianu, apoyamos tamién la proposición non de llei que s’aprobó na Xunta Xeneral y vamos siguir esixendo que l’Alministración asuma les sos responsabilidaes y cubra a estes persones que ven agora les sos vides hipotecaes y la so salú bucodental dañada».

El portavoz de la formación morada apuntó qu’esti fraude dexó un resultáu de «unes mil persones estafaes n’Asturies, 700 d’elles en Xixón, y cuasi 74.000 en tol país. Taben presentándose denuncies dende va seis o siete meses y l’Alministración nun fue capaz de prever nin d’actuar colo que taba pasando, que yera una estafa en toa regla». Añadió qu’esti casu pon de relieve que «la salú bucodental tien que formar parte del sistema sanitariu públicu, tien que ser d’accesu universal y gratuitu».

Na manifestación tamién participaron Andrés Fernández Vilanova, diputáu portavoz de temes de salú; Jara Cosculluela, coportavoz d’Organización de Podemos Asturies, Mario Suárez, portavoz municipal de Xixón Sí Puede, y David Alonso, conceyal de Xixón Sí Puede.