El diputáu, que participó col conceyal Xune Elipe na manifestación de la plantiya, va preguntar al conseyeru qué xestiones llevó a cau

Enrique López pidió esti miércoles, en declaraciones a los medios de comunicación previes al comienzu de la manifestación de la plantiya del supermercáu avilesinu de Llaranes (antiguu economatu d’Ensidesa), que la Sociedá Estatal de Participaciones Industriales (SEPI) «apueste pola continuidá d’esta instalación y, sobre too, pola continuidá del empléu. Ye lo que pide’l vecindariu y ye lo que piden les trabayadores, y tienen derechu a ello». El diputáu del Grupu Parlamentariu de Podemos Asturies va preguntar al conseyeru d’Empléu, Isaac Pola, nel plenu de la Xunta Xeneral d’esti xueves, qué xestiones fizo nesi sen cola SEPI.

El parlamentariu de la formación morada, que participó na manifestación col conceyal de Somos Avilés Xune Elipe, añadió que «nun sabemos si los posibles cambios que va haber na SEPI col relevu de Gobiernu pudieran retrasar esto», pero mostróse confiáu en que’l cambiu de color del Executivu central «polo menos na relación ente’l Gobiernu asturianu y l’estatal habría d’afectar de manera positiva, ensin duda nenguna». En cuantes a la mediación del conseyeru, esplicó que «yá’l 15 de marzu lleváramos al Parlamentu asturianu una pregunta al respecto y él comprometióse a mediar, porque equí la responsabilidá ye d’una empresa pública, la SEPI».

Enrique López considera que «les instituciones asturianes han de tener un papel activu en situaciones como ésta. El conseyeru d’Empléu asumió esi compromisu públicamente nel so momentu, pero tres meses dempués nun hai inicios de que ficiera nenguna xestión, pesie a lo que me dixo a mí personalmente». Asina les cosas, conclúi, nel plenu d’esti xueves «vamos intentar aclaralo, porque llevamos una nueva pregunta pa saber en qué quedaron eses xestiones».